Yavusa Nabobuco e Nasiriti

E DUA na i wase ni yavusa levu ko Nabobuco era vakaitikotiko ena loma ni koro vakaturaga o Nasiriti ena loma ni vanua kei Naitasiri.

E vakaraitaka ko Poasa Naleba e Nasiriti ni rua na mataqali e tawana tiko na koro o Nasiriti ena gauna qo, oya na mataqali o Bureca kei na mataqali o Mataso.

“Na mataqali o Bureca e tiko kina na Tokatoka o Lau ka nodratou manumanu na beka kei na nodratou kau na bitu,” e kaya o Naleba.

E kuria na turaga yabaki 62 qo ni karua ni mataqali ena yavusa Nabobuco ka ra tiko e Nasiriti na mataqali o Mataso.

“Na mataqali qo o Mataso e tolu na kena tokatoka, na tokatoka o Nasiriti, tokatoka o Mataso kei na tokatoka o Nakorowaiwai,” e kaya o Naleba.

E tomana na nona vakamacala ki na Nai Lalakai o Naleba ni tokatoka o Nasiriti e nona kau na dakua ka nona manumanu na bune ia e sega tikoga ni ratou taura rawa na nodratou ika.

“Na tokatoka o Mataso kei na tokatoka o Nakorowaiwai e nodrau kau na leba ka nodrau manumanu na bune ia na nodra ika na libu,” e kaya o Naleba.

More Stories