Yavia totolo de katia na qio

NA GAUNA e dau vakayacori kina na siwa walu e na yanuyanu ko Yaqaga e na Tikina ko Lekutu, e na yasana ko Bua, eda rawa ni raica na veimataqali waqa ni ra veisiriyaki toka e na mua ni yanuyanu e na yasana i matau.

E vakadeitaka o Ratu Sikeli Vualiku ni vanua ni walu levu duadua e na noda Viti, e ra tiko e na waitui volekata na yanuyanu ko Yaqaga.

“Ni sa dau gauna ni siwa walu, se me nunuvi, era sa dau kila vakavinaka na cauravou ni Yaqaga na ka me ra cakava.

“Na gauna ga e sa lau kina na moto ki na dua na walu, e ratou sa na vakalutulutu sobu ki wai e lewe tolu se va na cauravou me ra na biliga na qio, kevaka e boica mai na dra ni walu.

“E bau dua toka na cakacaka rerevaki, ia, e sa matau vei ira na cauravou ni Yaqaga, ka vakadomobula tale ni da raica,” kaya o Vualiku.

Tomana ni vica na cauravou era sa laukati oti e na qio e na gauna e bera kina na nodra yavia na walu.

Ia, e sega ni ra bau rere na cauravou na vakabiligi ira tiko na qio lelevu e na nodra sa ciciva yani na walu me ra kania.

E kuria o Vualiku ni dokai ira dina na cauravou ni yanuyanu ko Yaqaga e na kena bucini ni dua na i walewale matau, ka vakavuna me sega ni katia rawa kina na walu o ira na qio lelevu.

“Bau cava tu na sara i yaloyalo e na gauna era sa vakalutulutu sobu kina me ra biliga tani na qio, ia, mo namaka tiko ni na rawa ni yaco e dua na vakacalaka, kevaka e bera na nomu biligi ira tani na i taukei ni wasawasa oqo,” tinia o Vualiku.

More Stories