Yalomatua kei na rere

Update: 10:28AM ENA veitalanoa me baleta na vakailavotaki ni kawa iTaukei, au gadreva me�u lesuva tale e dua na tikina au sa dau vakabibitaka vakawasoma, oya meda yalomatua. Ia, au na vakuria ka�u semata talega kina kei na vosa oqo, na yalo ni rere e dodonu me tiko vei keda ena veika me baleta na noda i yaubula.

Ena daumaka me�u wasea e dua na kena au doka vakalevu oya e na nona rere me vakadonuya na veivoli ena nona qele vua e dua na wekaqu. E tiko vua kei tamana lailai na vakatulewa baleta e dua na tikiniqele vinaka sara, e tiko e baravi, ena kedra maliwa na veivakatorocaketaki lelevu. Era sa lewe vuqa sara era gadreva na tiki ni qele oqo ka yalataki vua na i lavo, ka yaco sara me ciqoma nona vakatutu e dua na daunibisinisi.

Ia ni se bera ni vakadonuya vakaivola, e a qai masu na turaga oqo, ka kerea na veivuke va-Kalou. Ni sa oti oqo sa qai kacivi ira kece na nona matavuvale, ka ra veitalanoataka vakatitobu na veivoli sa vakayacori oqo. E a qai kunea o koya ni sa na volitaka tiko e dua na qele ka sa na cawadru vakadua mai vei iratou.

Sa dua na ka na noqu marautaka na turaga oqo ni sa mai kere vakasala kivei au. Au sa vakasalataki koya me vakadeitaka vakabisinisi, se na cava mada na kena i dole dodonu na nodratou qele ena gauna sara ga oqo; ka dau vakatokai me �survey to determine market valuation�. Ni sa kilai oqo ena qai rawa kina na veiwekani vakabisinisi, ka tuvani e dua na kena i tuvatuva me kakua ni cawadru tani mai kina e ligadratou na nodratou qele oqo.

Meda vaka kece oqo o keda, oya, meda rere, ka kerea na veivuke va-Kalou, ena qai soli kivei keda na yalomatua. Me kakua na yalowai, ka dau vodo vata kei na qaciqacia, ka kaya ni sa i au ga. Na qele oqori e nona na kawa ka vuqa na kena vei tuvatuva me rawa ni vakayagataki kina ena veivakatorocaketaki, ka tiko dei vei keda na kena taukeni.

E vakarautaka tiko na matanitu e $10 na milioni ena veiyabaki me vukei keda ena vakatorocaketaki ni qele, ka sa veivuke tiko, ia, au sa vakaraitaka e loma ni Palimedi ni votavota oqo e lailai sara. Me vaka na veitavulaki vaka-Palimedi, au okata oqo me �peanuts�, ni�u vakabauta me levu cake sara, ka�u a vakaraitaka ni dodonu me $150 milioni ena veiyabaki. Na i lavo au lavaka oqo era tokona o ira na dau ni lavo kevaka e gadreva na kawa iTaukei me vakaiyautaki talega ena veivakatorocaketaki sa yaco tu oqo ena noda vanua. Eda raica na vakatubu bisinisi, kei na buli yau, ka caramaki na noda qele kei na veidogo, ia, eda na sega sara ni kunea na kena yaga kevaka eda sega ni sema kina vata kei ira na daunibisinisi. 

Oqo e dodonu kina me tiko vei keda na i lavo qaqa meda cakacaka kina. Eda vakananuma na tekivutaki ni Fijian Holdings Ltd, ka sa tu vua e daidai e drau vakadrau na milioni, ka yavutaki mai ena veivakailavotaki e $20 na milioni ka ra vakadonuya na noda veiliutaki ena gauna koya. 

Me�u tinia ga ka vakabibitaka meda yalomatua, ka tiko na yalo ni rere, ka vakadikeva vakavinaka na veika kece e baleta na noda i yau bula.

More Stories