Yalo ni dauveiqaravi dina

E DAU vuqa na kawa i taukei, e dau sega tu ni kilai na ka e dau oga kina ka qai dau kilai ga ena gauna e sa leqa oti kina. Oqo me baleta ni da kawa tamata sega ni dau tukutuku ni keda ena ka e da sa yaga oti kina.

E dau yaco vakalevu talega oqo vei ira na noda marama ka dau sega ni kilai tu vakalevu na nodra veiqaravi me vakatautauvatataki vei keda na turaga ena dua na vuvale se vanua ka dau matanitaki na Maciu 6:1-4, ?…ni ko sa soli ka, me kakua ni kila na ligamu i mawi na ka e sa solia na ligamu i matau, ia na tamada vakalomalagi ena qai solia na nona veivakalougatataki ena soli loloma e sa caka lo vakaoqo?.

E vakadinadinataki oqo ena kena mai vakananumi tiko ena macawa sa oti na bogi 100 ni nodra vakacegu o Vuniwai Adi Laufitu Malani na imatai ni lesilesi iliuliu ni UN Women ena Pasifika (UNIFEM) ena dua na gauna.

O Vuniwai Adi Laufitu e cavutu mai Nabukadra, Nakorotubu, Ra ena vuvale vaka Gonesau.

E nodra i tubutubu turaga o Ratu Meli Salabogi ka itubutubu marama o Adi Livia mai Nayavuira, Nakorotubu, Ra.

Me tautauvata kei na tamadra lailai, e ra a vuniwai talega ka ra veiqaravi e na CWM Hospital e Suva, Vunidawa Health Center e Naitasiri kei na Namarai Health Center e Nakorotubu, Ra ni bera ni lai tosoi tale na vuli torocake e Amerika.

Ena gauna e a vosa kina ena nodra lotu ni veibulu o Tauga Vulaono na Peresitedi ni National Council of Women (Fiji), e vakamacalataka na nodra i tukutuku bula yaga ka sega tu ni kilai.

Ra Women?s Kitchen and Guest House, Nanukuloa, Ra

E dua na kedrai divi sa i koya na kena a ciqomi na kerekere mai vua na nodra nana lailai o Mrs Kelesi Malani ka Peresitedi ni Soqosoqo Vakamarama ni Yasana o Ra ena 1988 ena kerekere ni veivuke me baleta na kena vakasaqarai na i lavo ni kena tara na vale ni vulagi ka tiko qo ena i tikotiko ni valenivolavola ni yasana mai Nanukuloa.

Oqo e vu mai na kena dau laurai na nodra dau oga tu ga ena katakata ni siga kei na tau ni uca na marama ni yasana o Ra ena vakasaqa kei na veiqaravi ena gauna e dau vakayacori kina na bose ni yasana o Ra.

E sega talega na vanua me ra dau moce kina na vulagi.

E a caka e dua na tausoli ni marama ni yasana o Ra ka lako vata kei na kere veivuke mai na veivalenivolavola ni veimatanitu me vaka i Niu Siladi, ia e a se bera ga ni veiraurau kei na kena tara vakaoti na vale ni vulagi oya.

E qai kauta na title ni nona vale vakaitaukei ka tiko ena Ratu Sukuna Rd e Suva me lai mokititaka (mortagage) ena baqe ni ANZ me rawa ni saumi kina vakaoti na tara ni vale ni vulagi oya (Ra Womens Kitchen & Guest House) ka tiko ena i tikotiko ni valenivolavola ni yasana e Dadamu, Nanukuloa.

E qai sauma ga vakataki koya na kena sere mai na nona vale e Ratu Sukuna Road mai na baqe.

Ni sa galala kece na i sau ni tara ni vale ni vulagi mai Nanukuloa, e sa qai vola me toki me sa nona i yau na yasana o Ra ena ruku ni Uluda Holdings Limited na Ra Womens Kitchen & Guest House.

Ra Youth Hostel, Reki St, Suva

E dua tale na nona sasaga vinaka sai koya na kena a voli na vale ka ra dau vakaicili kina na gone ni Yasana o Ra ka ra vuli tiko ena vuli torocake ena USP, Fiji National University, kei na veikoronivuli tale eso ka sega ni tiko e Suva e dua na vanua me ra vakaicili kina.

E a vesuka talega na title ni nona vale e Ratu Sukuna Rd e Suva me mokititaki ena baqe ni ANZ Bank me veivuke ena kena saumi vakaoti na Ra Youth Hostel e Reki St.

Ni sa saumi oti, esa qai solia yani me sa wili ena i yau ni Yasana o Ra ena ruku ni Uluda Holdings Ltd.

E vuqa sara na gone ni Yasana o Ra era sa cakacaka vinaka tu ena gauna oqo ena Matanitu kei na veikabani ka ra a susu mai na i tikotiko ena Reki Street.

UN Beijing Declaration for Women?s Rights.

Ena gauna e a liutaka tu kina na tabana ni marama ena vuravura ka veiqaravi ena Pasifika (Head of UN Women-Pacific) se UNIFEM ena gauna oya, e a tu taka na kena dikevi na kena tosoi cake na veiqaravi ni marama.

Ena vuku ni sasaga oqo, esa mai vakavotukana ena lewa eso ka sa ra veiqaravi sara vakalevu na marama ena itutu e dau sega tu ni rogo e liu me vaka na Speaker ni Bose Lawa, Acting PM, liuliu ni kabani kei na vuqa tale.

Personal Adviser (PA) to Leader of Opposition- Ro Teimumu Kepa

E na gauna e a cegu mai kina ena Minisita ni Marama (Minister for Women and Social Welfare) ena matanitu tu vakawawa (Interim Government) ena 2007, e a mai veivuke ena kerekere ni wekadra, na marama Roko Tui Dreketi ena veika vakapolitiki ni bera ni ra qai mai kere vakacegu ena bibi ni tauvimate ena yabaki sa oti.

Ni sa mai cava koto na vakananumi ni bogi 100 nei Adi Laufitu Malani, e da sa vakavinavinakataka e dua na marama yaga ka duavata ena vosa ni Turaga, ?O sa Dina ena ka e vica ga, curu kina marau ni nomu Turaga?.

More Stories