Yalataki vua ni na sarava na gauna eso

E VAKARAITAKA ko Jovilisi Kedrayate, yabaki 84, ni sa dodonu me na me uqeti na noda vakasama na veisiko e ratou cakava mai an lewe tolu na Jiu ka oka vaka Rapai ka tabaki tu na kedratou i tukutuku vata kei na itaba e na Vukelulu e ni Epereli 2015 ena i Lalakai.

E dusimaka o koya ni vica na ka e dodonu me vakavure vakasama vei keda.

Ko ya na:

1. E ratou mai sikovi na lewe 15 na wekadratou na Jiu era sa vakaitikotiko e Viti e na gauna oqo.

2. E mai vakayacori na soqo ni kana vata ni lako sivia. E kena i rairai ni vaka e tiki ni soqo vakalotu ni dua vei ratou e taura tu na madrai sega ni vakaleveni o koya e na vakayagataki ena soqo oqo.

3. E kainaki ni se qai matai ni gauna me vakayacori ki na soqo ni kana vata ni lako sivia e Viti, ka ra oka ga kina na Jiu.

4. E soqo ni veivakananumi se vakanananu lesu kina 3000 na yabaki sa oti ena nodra sa sereki na kawa tamata oqo na Jiu ena veiyabaki ni tu vakabobula mai Ijipita. E ratou raica ni vica na ka e da via tautauvata ka vakabauta ni rawa ni o keda nai taukei e Viti, eda dua vei ira na yavusa ka sa yali tiko mai vei ira na kena vo ka ra se tiko mai kea.

5. Na veika eda tautauvata kina, e da dau veikauwaitaki, ka dau loloma, eda dau mata mamarau, eda dau taleitaka na kana bulago.

E vaevei oya? Se cava na usutu levu ni veisiko mai oqo, e na noqu rai ni sai ira oqo na kawa ni tamata ka kacivi ira tani na Kalou e ra kawa i Eparama me ra tawase tani mai na kumukumu levu mai vei ira na wekadra dina e na veivakarautaki ni Kalou e na dua na lakolako vou me vaka e tiko e na i Vola Tabu makawa. (Vakatekivu 12:1-4), e kaya o koya.

Luria ka kaya ni sega ni dau yaco wale eso na ka vakaoqo, ni tiko na i naki vuni ni Kalou me raica ka vakasama kina vakatitobu na veika e rawa ni yaco tarava mai.

E kauta lesu na noqu vakanananu na veika au a bulagoci kemuni oti kina e na pepa vata ga oqo ena mua ni yabaki sa oti. Ena raivotu e a tukuna vei au ko Emosi Manumanunivalu mai na koro ko Logani, Bau, Tailevu, e kaya.

Tomana ka kaya na i talanoa ni buli sui mamaca ka vakayacori mai Taqaniika, Aferika ni oti na i karua ni valu levu e vuravura.

E kena i naki, me kilai se o cei na matanitu esa na kau lesu mai vei koya na kato ni caka mana e rau a kauta lako na drua i valu (Na Ciri) e na nodrau a vakatalai tani mai Nakauvadra ena vuku ni nodrau vakamatei Turukawa nai vakayadra nei Degei.

Kaya o Kedrayate ni a sa kauta lesu mai ko Emosi Manumanunivalu na kato oya ni oti na nona winitaka na nodra buli sui mamaca na Vu Kalou ni veimatanitu ni vuravura oqo.

E vakabibitaka vei au ko Emosi meu raica na veitarataravi ni veika e na yaco e Viti.

Na tara ni veivale ni veivakatikori me vakataki Raiwaqa kei na vuqa tale.

Ena vakaduri e na veitaoni lelevu me vakataki Suva na veivale lelevu taba ya vica vata me vale ni caka bisinisi ka na so vei ira na veivale lelevu oqori era na taukena nai taukei e na cakacaka ni solesolevaki.

Era sa duri tu edaidai e na gauna oya, e sa bera mada ga ni dua na i taukei e lamata cake, ka se o Ratu Sukuna duadua sara ga.

Era duri na veicina duiroka e loma ni taoni me lewa na veitosoyaki ni tamata, na motoka kei na lori.

E sa na cava talega e keya na nodra dausoli pasi na ovisa.

Ena veipoidi eso me vakataka na kona levu vei BP kona ni sala ena Waimanu donuya na Lilac Theatre kei na basoga ni sala ki Turaki vata kei na Centre Point e Vuniivi e lomai Suva donu, e kaya.

Tomana ka kaya na turaga ni Naimasimasi, Tailevu oqo era sa na mai vakatoroicaketaki Viti eso na matanitu vaka Esia, eda a sega ni dau veilakovi vata e liu, era na kauta mai eso na i lavo me mai vukei keda.

Ena yabaki sa oti, 2014, e rau sa tadu mai kina nai liuliu ni matanitu o Idia kei Jaina.

E kea sara ga, sa tekivu me dalaga na qase qo.

Ni oti e 63 vinaka na yabaki mai na kena tukuni vei au na i tukutuku oqo, oya mai na yabaki 1951 ki na 2014.

Na ka au via kaya oqo, mai na nodratou veisiko mai oqo na Rapai na nodra i vakavuvuli na Jiu ka ra dau ni veivakasalataki talega ena kena tutaki na dina, au sega ni kila se vakaibalebale vei kemuni se sega?

Vei au e rui vakaibalebale vakalevu vei au.

Tukuna o koya ni a kaya vaka oqo ne vei koya ko Emosi!: Na gauna e na vakayacori tiko kina na veivakatorocaketaki e Viti, esa na vakawelea na nodra vakasama nai taukei na toso levu oqo ka sa na mamada mai na nodra veilomani vakataki ira.

Ena gauna vata oya e na yaco e dua na ka levu e vuravura.

E sega ga ni kaya vua na tevoro se ka levu cava oya?

Vei au esa na lesu mai na turaga o Jisu.

E vakadeitaka o Kedrayate na tikina e vosa kina o Paula enai matai ni Cesolonaika 5:2-4- Ni dou sa kila dina sara vakataki kemudou ni na lako mai na Turaga me vaka na daubutako ena bogi, ni ra sa kaya tiko eda sa qai vakacegu ka tiko vinaka, e na qai yaco vakidacala vei ira na rusa me vaka na yaluma vua na yalewa sa bukete era na sega ni drotani rawa.

A mai tinia o Kedrayate e na nona vakatakekere mera na veivakayadrati na i Talatala ni veilotu Vakarisito e Viti ena vuku ni nona sa voleka ni lesu mai o Karisito ke sega ena tarogi kemuni na Kalou e na vuku ni nomu i tavi. (Isikeli 3: 17-18).

More Stories