Wasei na veiqaravi ni wai ni bula e Dawasamu

Update: 10:50AM ENA gauna qo e sa rabailevu sara na veiqaravi me baleta na wai ni bula e Natadradave, ena loma ni tikina o Dawasamu ena Vualiku kei Tailevu.

E vakaraitaka ko Tomasi Naisoso na turaga ni koro e Natadradave ni sa lewe levu sara na lewenivanua era sa mai qaravi ka ra sa bula kina ka vaka kina na koro o Delakado kei na vanua ni sisili e Wakanase.

�Sa mai rawa na bula ia, eso vei ira na tauvimate bibi era sa mai vakaicilitaki ena veivale ena noqu loma ni koro qo e Natadradave me waraka na nodra mamada mai na mate e tauvi ira,� e kaya o Naisoso.

E kuria na turaga yabaki 32 qo e dina ni sa mai rawa na bula vinaka ni oti na nodra mai qaravi ena wai ni bula ia e ora tiko na lomadra ni sa roro tiko mai na gauna ni cagilaba ka ra se tiko ga ena vale laca kei na so na lewenivanua era se bula sara tikoga ena i vovo ni kava kei na kau ka ra tomika rawa ni oti na cagilaba o Winston.

�Sa dua na ka na neimami lomaleqataka tiko na lewe ni koro ni sa roro tale tiko mai na gauna ni cagilaba oya me tekivu mai na vula mai qo ki na vula o Epereli ena yabaki vou,� e kaya o Naisoso.

E tomana o Naisoso ni ra sa mai veiqaravi tiko vei ira na lewei Viti ena nodra dau mai maroroi eso na tauvimate ena vuku ni tauvi mate bibi e bikai ira voli mai ka gadreva kina me kerekere ki na matanitu ke bau rawa ni vakatotolotaka na veivuke me baleta na nodra i yaya ni vale ka me rawa ni vakacokonakitaki rawa ni sa bera ni ra yacova na gauna ni cagilaba.

�Ena gauna qo na kakana ga au sa rawa ni rawata mai keitou sa bula kina vakavuvale kei ira na tauvi mate era mai vakaicili tiko vei keitou, ia au vakavinavinaka ni eso vei ira na tauvimate era sa dau kau kakana tale tu ga mai,� e kaya o Naisoso.

E tomana o Naisoso ni sega sara ni bibi vua na nona kauwaitaka na kakana me ra bula kina ia e bibi ga vua na nona na qaravi ira na tauvimate era mai gunu ka sili e na wai me ra bula vinaka.

�Esa vinaka na veika e ratou mai cakava na tabana ni caka sala ena nodratou sa mai qaria vakatautauvata na vanua ni sisili kei na vanua me dau mai kele vinaka kina na lori,� e kaya o Naisoso.

Ia, e kuria o turaga ni koro ni sa mai vakabenubenu tale tu e na loma ni koro nai vovo ni qele e ratou qaria mai na tabana ni gaunisala ka ratou tukuna ni na mai vakatautauvatataki ka se bera ga ni ratou mai cakava vakaoti.

E vakaraitaka ko Wave Lutumailagi e dua na turaga ni Qalira mai Nabukebuke e Kadavu na mosimosi ni ulu e dau tauvi koya tiko kei na nona dau sega ni lako vinaka tiko ena vuku ni leqa tiko na dibina esa mai vinaka ena nona sili tiko e Natadradave.

�Au sa qai mai sotava e dua na veivakabulai esa bau mana saraga ni sa oti vakadua na mosi ni uluqu, sa taubale sara tu ga qo ka sa oti na mosi ni dibiqu,� e kaya o Lutumailagi.

E tukuna na turaga yabaki 59 qo ni sa voleka me otiva kece na veimataqali vuanikau mai valenibula me baleta na mosi ni ulu ia e sega ni dua na veisau e yacovi koya, e na nona biuti Kadavu mai me mai vakadinadinataka na wai ni bula e Natadradave esa dua na ka na nona vakavinavinaka levu vua na Kalou ena nona veivakauti kei na nona veivakabulai ena waidroka qo.

Na veiqaravi ni veivakabulai oqo e ratou sa veivuke tale tikoga na tabana ni wai e na noda vanua ena kena ta vakamatau nai kabakaba ni sisili ena kena vakasimedetaki ka ratou sa tara vale laca tale tikoga ena vanua ni sisili e Wakanase ena nodratou na vakasimedetaka na gaunisala nodra era sega ni lako rawa ka ra vakaqiqitaki ena i dabedabe qiqi (wheelchair).

E vakaraitaka ko Taniela Dike na nodratou i liuliu na tabana ni wai ka veiqaravi tiko e na vanua ni sisili qo ni ratou sa latia na wai e Wakanase me rawa ni biu kina e ono na gusu ni paipo ni wai me vakayacori kina na sili kei na taki wai.

�Na ono na paipo qo e ratou vaka ki taucoko me rawa ni sogo ni oti na kena vakayagataki ka sa na tomani tale eso na cakacaka me rawa ni taucoko kina na veika e gadrevi ena vanua ni sisili qo ena nodra vakabulai na lewenivanua,� e kaya o Dike.

More Stories