Waraki na macala ni veitalanoa

ERA se waraka dede tiko mai na Mataqali o Vatuba kei na mataqali o Naviro, ena koro o Rewasau ena colo kei Naitasiri me rawa ni vukei iratou na i liuliu ni matanitu ena vuku ni nodratou qele ka mai vakayagataka na matanitu me caka kina na veivakatoroicaketaki ni qaqi ni livaliva ena wai e Monasavu ena 40 na yabaki sa oti.

Kaya na gusunivosa ni mataqali o Ratu Naivolione Delasau ni sa vakavica vata na nodratou veitalanoa ena talevoni kei na veisiko vei iratou na i vakailesilesi ena valenivolavola ni Paraiminisita ena kena vakamuri na nodratou i vola e a volai ka ciqomi ena 14 ni Seviteba, 2017 me baleta na nodra kauwai, ia e se sega ni dua na ka e se vakayacori ena nodratou kerekere.

Kuria o Ratu Naivolione ni ratou a solia na nodratou qase e sivia na 4000 na eka ena kena vakayacori na veivakatoroicaketaki oqo e Monasavu me rawa ni qaqi kina na livaliva eda sa mai marautaka tu e Viti Levu ena gauna oqo.

?E laurai ni mai caka toka vakalawaki ka sega ni kauwaitaka kina ka nodra dodonu kei na nodra galala na i taukei ni qele me vaka e sa vakamatatataki ena UNDRIP vaka talega kina na Yavu ni Vakavewa ni matanitu tu galala eda sa cici tiko kina nikua.

?Keitou kerea tiko na mataqali e rua n aka me cakava na i liuliu ni matanitu.

?Matai me vakalesui na nodrau qele ka mai voli vakadua mai Monasavu vei rau na mataqali e rua oqo. Karua, me na tarovi na Tabana ni Livaliva ( FEA) na nona via volitaka na sea e tiko Viti kei valagi ka me na soli main a 51 na pasede na sea oya vei keimami na taukei ni qele.?

E vica tale na veika e kerea tiko na lewe ni mataqali e rua oqo kina matanitu me vaka na nodra solia tiko vakalalai na Tabana ni Livaliva na nodra $460,000 ena dua ana yabaki ki na 12 na mataqali kei na 7 na yavusa me yacova sara e 99 na yabaki ka me i lavo ni vakavinavinaka ni kena vakayagataki na i vakaso ni wai e Monasavu.

?Esa gadrevi me sa soli ga vakadua na i lavo oqo ka rauta ni $5 na milioni mai na kena soli tiko vakalalai.

E vakabibitaka o Ratu Naivolione na nodra gagadre na lewe ni rua na mataqali o Vatuba kei Naviro oya me na raica ga o Voreqe Bainimarama na kena vakadodonutaki na kena cakacakataki ni nodra i lavo na i taukei ni qele ka ra se waraka tu mai oqo vakabalavu.

E kaya ni daumaka me na kua ni kau tale vakaveilewai ka wali ga e taudaku ni mataveilewai na veitalanoa oqo ka me ra loma vakacegu kina na i taukei ni qele.

?Me yacova mai oqo na i lavo e soli tu mai oqo vei keimami na i taukei ni qele e saumi tu e dua na lewe ni mataqali e rauta ni $20 na dua, ka me yacova sara ni sa saumi tu mai vakalalai na i lavo oya ena loma ni 99 na yabaki.

?Mai na kena soli tiko na i lavo oqo dua na yabaki, ena $20 dua na yabaki, e sa veivakalolomataki ka sega ni dodonu me mai caka tu na i vakarau oqo vei keimami na i taukei ni qele ka mai vakayagataki na neimami i yau bula me rawa kina na veika raraba me baleti Viti,? e kuria o Ratu Naivolione.

E sega ni dua mai na nodratou tukutuku ena vuku ni ulutaga oqo na Tabacakacaka i Taukei kei na Matabose ni Qele Maroroi ena gauna e vakau kina na taro mai na tabana ni Nai Lalakai.

More Stories