Wai ni bula e Matailobau

Update: 11:33AM NA wai makare sese ka kilai tani kina ko Matailobau e sa dua na ka na kena gunu vinaka vakauasivi e na draki katakata e da donumaka tiko qo.

Na wai oqo ka yacana na savu-si-vere e vure tiko e na yasa ni koro ko Matailobau e na tikina o Matailobau e na yasana vakaturaga o Naitasiri. E dua na mataniwai oqo na savu-si-vere esa vakadinadinataki vei ira na lewe ni koro ni sa veivakabulai tiko e kea ena mate kecega.

Na wai oqo e sa vakadinadinataki e na vakadidike vakamatanitu ni tiko kina na silica naba dua ka vakilai talega na kena mana vei ira era sa gunuva.

Na mataniwai qo e laurai ka kunei e na vakadidike ni tekivutaki tiko mai e na yavutu makawa ka nodratou vanua tabu na Vunisava se Kalou ni Kakana e na koro ko Matailobau.

E ra dau kilai na Vunisava (Kalou ni Kakana) e na sau kei na mana e dau tu vei ira e na gauna makawa.

Ni digovi ka vakadikevi na yavu tu makawa qo e laurai ka vakaraitaka na tabana ni vakadidike ni yau bula ni tobu levu ni wai makare qo e dabe tiko e na delana levu ka nodra yavutu makawa e na koro ko Matailobau.

E vakaraitaka ko Sailasa Nacika yabaki 59 ka i taukei ni vanua e tiko kina na wai vure qo ni sa tiko na veitalanoa me baleta na sasagataki ni kena mai vakayagataki na wai makare qo.

�Ratou sa mai dikeva oti na tabana ni yau bula,� e kaya ko Nacika.

�Sa vakau sara ki Ositerelia e na kena laki dikevi mai e tukuni ni naba dua na wai qo,� e kaya.

E kaya ko Nacika ni ra sega ni dau lako kina vakaveitalia na tamata na vanua e tiko mai kina na yavu tabu ka dikevi ni tekivu drodro mai kina na wai qo.

Na noqu tovolea na wai qo e kauta tani vakadua na karamaca ka solia vei au na kaukauwa ena draki katakata.

Ia, na wai qo e drodro ka makare sese vinaka e na vanua e drodrova sobu.

E vakaraitaka ko Nacika ni dau gauna ni waluvu, oya me dau vuvu na wai, na vanua e drodrova yani na wai qo e na makare sese vinaka ga ka na laurai vinaka na kena duidui mai na wai burebure.

E levu era sa laki sikova na wai qo ka ra sa vakadinadinataka na kena i gunugunu ka ra sa mai talanoataka na kena veivakacegui vakauasivi ni vakaotia sara talega na mate e a tauvi ira tu mai.

Ni dau katakata na siga e na batabata tikoga na wai vure qo.

E ratou sa nuitaka na i taukei ni qele ka vure tiko kina na wai qo ni na rogoci e na dua na siga na nodra masu ena kena vakayagataki na wai qo.

Ia, e levu era sa gole tiko vakayauyau ki Natadradave mai Dawasamu ena gauna qo ena yasana o Tailevu, e dua na kalougata levu vakabibi ena loma ni yasana o Naitasiri ni sa tu makawa tu mai kina na wai qo ka ra sa vakadinadinataka e levu na lewenivanua ni sa veivakabulai sara tiko vakalevu.

A sa vakadinadinataka talega na  Nai Lalakai na mana kei na dina ni i tukutuku e ologi koto ena mata ni wai tovure qo na savu-si-vere.

More Stories