Vuli siga rua ni vakadewataki ni vosa

Update: 8:48AM ERA a vuli siga rua na noda Peresitedi ni Lotu Wesele e Viti kei Rotuma o Talatala Tevita Nawadra, na Vunivola Levu ni Lotu Wesele o Talatala Epineri Vakadewavosa, kei na ruasagavulu tale na i vakatutu e na loma ni lotu Wesele ka wili kina eso na Dikonesi, kei na so tale na i Talatala, o ira na Dauvolavola vata kei na so na Qasenivuli vakacegu e na valenivolavola ni Lotu ka toka tikiva na valenilotu na Centenary e Suva.

E vakailavotaka na vuli siga rua oqo na International Bible Reading Association (IBRA) ka tiko na nodratou vale ni volavola mai Peritania.

E vakaraitaka o Talatala Iliesa Naivalu ka Vunivola tiko ni Taba Cakacaka Ni Lewe Ni Vanua Vakarisito kei na Bula Raraba, ni naki levu ni vuli oqo, sa i koya na kena vakadewataki na vosa vakavavalagi mai na i volatabu, kei na i vola ni vula ni lotu Wesele ki na noda vosa vaka i Taukei.

Tomana ni ya veivakatavulici tiko e na nodra vuli siga rua oya o Apenisa Lewatoro e dua na turaga mai vua na Roko Tui Nasau mai na koro o Naimalavau e na Tikina o Nakelo ka cakacaka tiko e na Bible Society ka tiko na nodratou vale ni volavola mai Nabua.

Kuria o Talatala Naivalu ni levu sara na veisau eda sa donumaka e na gauna oqo, na i vosavosa, na i tovo ka vakakina na noda vosa na i Taukei.

Na i naki ni vuli oqo sai koya me ra tuvakataka e dua na i tuvatuva me rawa ni tautauvata kece na i vakadewa e biu ena volatabu, se e na i vola ni vula ni lotu Wesele, ka me kakua ni veicalati.

E kaya o Talatala Naivalu ni kevaka me vakadewataki vaqo, se va oya na noda vosa na i Taukei, e dua ga na ka me da kakua ni guilecava sa i koya me maroroi tikoga na i balebale dina ni veika e tukuni tiko e na i volatabu.

Kuria ni so na vosa vakavavalagi e lekaleka walega ni da cavuqaqataka, ia, ni vakadewataki ena noda vosa nai Taukei e na rawa ni kania vata e vica na drauniveva, ka tautauvata tikoga na kena i balebale.

Tinia ga na nona i vakamacala o Talatala Naivalu ni sa vakauqeti vakalevu na kena dau volai na i tukutuku makawa vaka oqo, ka me vakadewataki mai ena vosa eda sa kila tu e na gauna oqo, kei na nona vakavinavinakataki Lewatoro ena nona mai vakacakulea vakamatailalai na vei ulutaga ka ra veiwasei kina ena siga rua oya.

More Stories