Vukei rawa e 6000 na vuvale

E rauta ni 6000 na vuvale era na wasea e $25 na milioni e vota tiko na matanitu ena vuku ni veivakacokotaki ni vale, me vaka na nona veivakadeitaki na Minisita ni Lavo ka Vunilawa e Viti o Aiyaz Sayed- Khaiyum.

Ena nona kacivaka na i tuvatuva oqo ni matanitu, vakadeitaka o Khaiyum ni ra na vukei ena i tuvatuva oqo na vuvale era tik ena yasayasa o Tavua, Ba, Lautoka, mai na yatu Yasawa, o Cakaudrove kei Bua.

Na kena veivotayaki na veivuke oqo, ena veiqaravi kina na Minisitiri ni Bula Raraba, ka na soli tiko vei kemuni na lewenivanua na tikidua ena kena rawa ni voli mai vei ira na sitoa ni volitaki yaya ni vale na nomuni yaya ni tara vale.

E na i matai ni wasewase ni veivuke e solia na matanitu, e rauta ni $88 na milioni na matanitu ka ra vukei kina e sivia ni 20,000 na lewenivanua.

Na i karua ni wasewase, e wasea tale e $20 na milioni na matanitu ka ra vukei kina e 3800 na lewenivanua ena veivakacokotaki oqo,

Tukuna o Khaiyum ni sa tiko na veivanua ena kacivaka raraba na matanitu me ra na laki vukei kina na lewenivanua ena vuku ni veivakacokotaki e qarava tiko na matanitu vei ira na noda e vakaleqai na nodra vale se i tikotiko ena cagilaba o Winston.

Esa mai tekivutaki mai Ba kei Tavua ena siga Tusiti na veivuke oqo ni matanitu.

E so talega na bolebole e vakaraitaka toka o Khaiyum ena vuku ni veivuke oqo ni matanitu ena kena tiko na kauvaro kei na simede, ena vuku ni kena gadrevi vakalevu na kena oqo ena nodra sa volia na lewenivanua ena kena vakacokotaki na nodra vale ni oti na liwa ni cagilaba qo ena yabaki sa oti.

More Stories