Vukei na CFSS mai vei Lagani

NODA Railesu e na macawa oqo eda na wilika kina na nodra veivuke na matasere rogo e na noda vanua ki na koronivuli na Central Fijian Secondary School mai Nausori.

Ni tei wilika sara mada yani na i tukutuku ka a tabaki e na Na i Lalakai e na yabaki 1980:

Dua na koronivuli ka a tekivu mai e na dua na i lakolako malumalumu sara, volekata ena 30 na yabaki sa oti, e sa yaco nikua me dua na i sakisaki ni koronivuli ni i Taukei e na loma ni Tebara, ka ra vuli kina na gonevuli dui kaikai e na veiyasai Viti..

Na kena tauyavu na koronivuli oqo, e nona sasaga duadua sara tikoga mai e dua na turaga i Taukei, ka kilai levu e na noda vanua ko Misiada Sila, na turaga mai na koro ko Vunisei, e na Tikina o Toga Naqavoka, e na yasana o Rewa.

A sega ni bau vukei koya na matanitu, me yacova mai na loma ni vica na yabaki sa oti, ka sa qai dodoliga yani kina.

E a tauyavutaki na koronivuli oqo e na dua na rumu saumi e na loma ni tauni mai Nausori, ia, na gauna oqo e sa dabe toka e na dua na bucabuca totoka rairai vinaka, e na yasa ni koro mai Nausori.

E daidai e sa tiko na valenivuli buloko tabarua, ka vakakina na valenivuli ni vuli matai, idinia, kei na culacula.

Ia, sa sasaga tikoga oqo na koronivuli ki na cavuikalawa ni kena vakarabailevutaki na cakacaka ni koronivuli me baleta tikoga na nodra vuli na noda kawa tamata e na gauna oqo kei na veigauna sa bera mai.

E vuqa na sasaga era sa vakayacora oti na Matabose Levu ni Koronivuli kei ira na i Soqosoqo ni i Tubutubu me baleta na kumuni i lavo.

Ia, e dua na sasaga ni kumuni i lavo ka a se qai vakayacori oti wale tikoga oqo, e a sureti kina na noda gone domo koula ka kuruseti Viti kei na Wasa Pasifika na kamica ni domona, o Lagani Rabukawaqa kei na nona mataivakatagi me ra la?ki veivakamarautaki ki na rara na Ratu Cakobau Park mai Nausori, kei ira na veimatasere rogo tale e na noda vanua.

E lewe 4 taucoko na matasere era vakaitavi e na sasaga yaga oqo, ka okati talega kina na matavakatagi rogo e na buturara ni veivakamarautaki na ?Spining Wheels?

E osodrigi na vale ni sarasara mai vei ira na veitokoni ka vakasakiti dina na nodratou i vukivuki, ka mate dina na i lavo vei iratou na 4 na matasere oqo.

Na matasere e ratou veivakamarautaki tiko e na siga oya e ratou okati tiko kina o Lagani Rabukawaqa kei na nona matailawalawa, ?Gaunadivi Group? mai Nausori, matasere na ?Tadravakasiga? mai Toga Naqavoka kei na ?Kidanimataka? e dua na matasere mai na yanuyanu bulabula ko Koro, e Lomaiviti.

E na veivakamarautaki ka se qai vakayacori oti e na macawa sa oti, e a rawati kina e $1501.75, ka sa dua na veivuke levu sara ki na koronivuli ni i Taukei oqo.

Sa vinakati me vakaraitaki e na noda niusiveva oqo na i Taukei, na nodratou vakavinavinaka cecekia na Matabose Levu ni Koronivuli ki vei ira kece sara na matasere, era a vakaitavi kina, ka vakakina vei kemuni kece sara na lewe ni vanua ko ni a dodoliga e na dua na sasaga, ka ra na tuberi cake kina na kawa kei Viti e na veisiga ni mataka.

More Stories