Vu ni qaqa na Kalou: Naiqama

Update: 11:02AM E RAU sa na sota tiko na timi ni Vodafone Fiji Bati kei na timi ni Ositerelia ena semi fainala ni rakavi tinikatolu ni vuravura ena i katolu ni gauna.

Oya ni oti na nona qaqa o Viti vei Niu Siladi ena 4 kei 2 ena kota fainala mai Wellington ena mua ni macawa sa oti.

Ea vakavinavinakataka na Kalou o Kevina Naiqama na kavetani ni Bati ena nodratou sa mai qaqa rawa ka vakaraitaka ni ratou sa tu vakarau me na sotavi Ositerelia.

E rau na sota tiko na Bati kei na jabeni ni vuravura oya na timi ni Ositerelia ena semi fainala. E kaya o Naiqama ni a vinakata ga me vakavinavinakataka na Kalou ka tukuna ni a liutaka tiko na timi ni Bati ka vakavinavinakataka na yacai Jisu. E kuria ni dokai iratou na nona cauravou lewe ni timi.

Tomana o Naiqama ni vakabauti ratou tu ga na nona lewe ni timi ka sa mai dina na nodratou tatadra, e kuria ni ratou na vakadruka na timi ni Ositerelia ka toso sara tiko.

E dua na qito kaukauwa e ratou matanataka na noda cauravou Bati ena nodratou a liu tu ena 2 kei saiva ena i matai ni veimama ena nona caqeta curu o Apisai Koroisau na i totogi ni bera ni qai caqeta nai karua ni totogi ko Taane Milne.

Ia, e tukuna o Jarryd Hayne ni dua na veivakatovolei levu e ratou na sotava ena sota kei Ositerelia ka tomana ni nodratou kaukauwa esa taka mai vua na Kalou. E tinia o Hayne ni nodratou vakabauta na Kalou e yavu ni nodratou timi.

More Stories