Votai vakatautauvata ni lisi: E saqati

E VAKA e sega ni ciqomi sara vakavinaka ena bose ni yasana vakaturaga o Nadroga kei Navosa na vakatulewa ni matanitu me sa na vagolei na i lavo ki na dui akaude ni taukei ka volai na yacadra ena i Vola ni Kawa Bula ni Tokatoka, Mataqali kei na Yavusa era lewena.

Na bose siga rua oqo e a vakayacori ena koro o Nahigatoka ena Lotulevu kei na Vakaraubuka sa oti.

E a taqea dredre o Luke Maya mai na Matabose ni Qele Maroroi e so na taro e a vagolei vua, ia, e sauma talega yani vakadodonu.

E a taroga na Mata ni Tikina o Komave, ko Iosefo Tuirubi na cava e a sega ni bau soli kina vei ira na i taukei ni qele mera vakadeuca na i vakaro oqo mai na matanitu.

E sa tiko evei na neimami kaukauwa na taukena na neimami qele, sa vaka me sa kau tani vei kemami., ni via vakatulewa ga ni vakatulewa, keimami sa sega ni kauwaitaki?, e taroga o Tuirubi.

E kuria ka kaya e liu na oga vakavanua e levu na ka e vakaitavi mai kina nodra i liuliu na turaga na Tui Vusu, ka vakayagataki tiko kina oqori na i lavo ni lisi.

Ia, oqo ni lavaki yani vei ira na turaga na Tui Vusu me baleta na oga vakavanua, era sa sega ni vosa baleta ni ko ni sa mai sogota na i vurevure ni veiqaravi e na vanua!.

E taroga tale ga na Mata niTikina o Malomalo o Joeli Tubu e rawa ni tomani tiko ga na kena wasei na nodratou lavo ni lisi mai na koro o Sanasana me vaka e sa dau vakayacori tiko mai?

Ia,  e sauma o Maya ka kaya ni vakatulewa oqo e sega ni vakatulewa ni iTLTB, ia, esa lewa sara ga mai na mataniitu levu.

Keimami cakacaka ga e na ruku ni lewa, ia, ke tiko nomuni kudru, mo ni volavola vakadodonu yani ki na neimami valenivolavola, keimami na qai vakauta cake ki vei ira na veiliutaki ni matanitu, oqori na nomuni dodonu, e sauma o Maya.

 E kuria o Maya kaya ni sa dua na cagi ni veisau e sa liwavi Viti tiko oqo ka dodonu ga me da ciqoma na veisau oqo.

E vakamacalataka tale ga ni 21,121 na lewe ni yasana o Nadroga/Navosa era volai ena i Vola ni Kawa Bula.

Vei ira na lailai mai na yabaki 18, e sa maroroya tiko na iTLTB na nodra i lavo me yacova nira sa yabaki 18, e kuria tale o Maya ka vica tale na taro era basika mai ena i tukutuku oqo.

Dina ni a soli ga e tolusagavulu na miniti me veivosakitaki kina na ulutaga oqo, e so vei ira na lewe ni bose era vakaraitaka ki na i Lalakai ni lekaleka na gauna e soli mera vakaraitaka na lomadra ena nodra sega ni duavata kei na vakatulewa oqo mai na matanitu ena kena wasei vakatautauvata na i lavo ni lisi.

More Stories