Vosota o Lasaqa vu ni nona koula

NA nona cici voli ka sega ni vakaivava ni veitaucici e dua na ka e vukei Camari Adi Lasaqa mai na Wainibuka Secondary School me rawata rawa kina na koula ena i wasewase vei ira na goneyalewa (Open girls) ena 1500 na mita ena sotasota ni Qito ni Coca-Cola ena ANZ Stadium ena yabaki qo.

E dara toka e dua na sitokini, na goneyalewa yabaki 16 ni Nalidi, Wainibuka e cici vata kei ira na dauqito ka ra vakaivava vinaka ni cici, ia a mani vakadinadinataka o koya ni mai cava na veitaucici o koya ga e gadreva dina na qaqa ena rawa ni qaqa.

Ena i otioti ni rauni ena nona cici tiko o Lasaqa esa vakila o koya na mosi ni sa tekivu me bubuta mai na yavana. Ia, e sega ni yalolailai o koya ena nona tomana tikoga na cici me yacova yani na laini me la’ki cava kina.

“Au vakila ni sa tekivu me mosi na yavaqu,” e tukuna o Lasaqa.

“E dua na ka e lako mai na noqu vakasama, na noqu matavuvale kei na nodrau veivuke na dauveivakatavulici ena nodrau kauti au mai me’u mai cici. Sa mani noqu i gu kaukauwa me’u na liu ga.

“E sega ni kena i cavacava qo, au na tukuna tale, au a ciciva rawa yani ka rawata.”

A rawata o Lasaqa na gauna e 5.06 na miniti, Melania Turaga mai na Jasper Williams High School e karua ena 5.08 na miniti ka varasa o Lavenia Kororia mai na Naiyala Secondary School ena nona ciciva rawa e 5.13 na miniti.

Na isausau e 4.43 na miniti ka tekia tu o Maia Ramsden mai na International School e Suva ena 2017.
Ia, ena 3000 na mita e rawata talega kina na koula o Lasaqa na koula.

More Stories