Vosataki na Lotu

E tukuna e loma ni Bose Lawa na i liuliu ni matanitu, o Voreqe Bainimarama ni sa gusu ni vosa tiko ni soqosoqo vakapolitiki ni SODELPA na Lotu Wesele e Viti kei Rotuma.

Ena gauna e tarogi kina vei Bainimarama ke rawa ni laurai se raici lesu na Yavu ni Vakavulewa 2013 ena loma ni Palimedi, mai vei Mosese Bulitavu, e qai vakarogotaka kina na veika oqo na i liuliu ni matanitu me baleta na lotu kei na SODELPA.

E kaya ni rau cakacaka vata tiko na lotu Wesele kei na SODELPA ena kena vakadewataki tiko e levu na lasu.

E a vakaraitaka o Bainimarama ni nodratou vakatutu na Lotu Wesele me baleta na lawa ni koro e se tikoga kina eso na vakasama e gadrevi tiko me sa bokoci laivi.

E na nona vosa tiko ena retio yaloyalo, e kaya kina ni nanuma ga de sa leqa yani o Talatala Manasa Lasaro, ia , e kaya ni o ratou na i lawalawa e biuta vata na vakatutu ni lotu oqo me baleta na lawa ni koro e sega toka ni vinaka.

Ni qai rogoca na veika e cauraka oqo e Palimedi o ratou na i vakailesilesi ni lotu, e kaya mai o Nai Talatala Epineri Vakadewavosa ni na saga ena nona i gu me caka e dua na veitalanoa me rawa ni wali kina na leqa oqo kei na veika e sa mai cauraki tu oqo e Palimedi kei na tabana ni tukutuku.

?Esa tiko na i tuvatuva, ka sa sagai tiko na veitaratara ena nona valenivolavola na Paraiminisita me rawa ni dua mada na neitou veitalanoa ena vuku ni veika e sa tukuni ka rogoci tiko oqo,? e kaya o Talatala Vakadewavosa.

E na macawa sa oti, e a biuta kina na nona vakatutu na Lotu Wesele ena vuku ni kerekere mai na valenivolavola ni Minisitiri ni Veika vakaitaukei.

Ena tekivu ni vula oqo era a mai bose kina na i Talatala Qase kei na nodra Tuirara Levu, ena valenilotu ena Centenary, ka mai vakamacala ena vuku ni lawa ni koro na i vukevuke ni Vunivola Levu ni minisitiri o Saimoni Waibuta.

Ena nodra vakamacala oqo, e kaya ni sa gadrevi tu na vakatutu ni Lotu Wesele ena kena gadrevi tikoga me na vakamatatataki ka vakararamataki na veika me baleta na lawa ni koro, ni bera ni qai taurivaki ena veikoro kece e Viti.

Ena vakatutu ni lawa ni koro eratou biuta cake na Lotu Wesele, vakaraitaki kina na nona ririko.

?E kauwaitaka na Lotu Wesele na lawa vakaturi oqo ka ni na tarai ira ga vakalevu na nonai vavakoso ka ni ra lewe levu duadua era tiko ena veikoro.

?E ririkotaka na Lotu na kena taurivaki na vosa na ?village by-law,? sa kena ibalebale kina ni sa vakalawataki na umatamata iTaukei era tiko e na koro. Ni sa cavuti ga na ?law,? aya sa lawa, eda sa vauci ena lawa,? e vakaraitaki ena  i tukutuku raraba ka ratou vakarautaka mai na Lotu Wesele.

More Stories