Voleka na gauna ni veidigidigi

E A tiko mai Bolatagane na noda i liuliu ni matanitu, o Voreqe Bainimarama ena vuku ni bose nodra na i liuliu ni matanitu era lewena na Commonwealth ka vakayacori tiko mai Lodoni ena loma ni macawa oqo.

Ena nona tiko voli mai Lodoni, a soli talega e dua na gauna me laki sota kina kei ira na noda era sa laki cakacaka ka vakaitikotiko ena matanitu levu oqo o Igiladi.

A laki tataunaka tikoga o Bainimarama na bibi ni nodra vakaitavi na noda ena vuku ni veidigidigi e da nanamaki kece tiko kina.

E kaya ni na qai macala malua na tiki ni siga ena vakayacori kina na veidigidigi ena yabaki oqo, 2018.

Vakadeitaka na i liuliu ni noda matanitu ni ka bibi na nodra rejisita na lewenivanua e Viti mai Lodoni me rawa ni ra vakaitavi ena veidigidigi ka me da na digitaka kina na matanitu cava ena liutaki keda yani ena va na yabaki sa tu mai liu.

E tukuna vei ira na noda era tiko mai Bolatagane ni sasaga ni nona matanitu me na liutaki vakavinaka na lewenivanua kece e Viti, wili kina o ira era tiko ena i To ni Veisaqa.

E vakadeitaka na Peresitedi, Joji Konrote ni rawa ni vakayacori na veidigidigi e Viti ena maliwa ni vula o Epereli ki na Noveba.

E sa vakadeitaka talega mai ki na veitabana ni tukutuku na valenivolavola ni veidigidigi ni macala ni tiki ni siga ni veidigidigi ena qai vakatulewa ga kina na i liuliu ni noda matanitu, o Bainimarama.

E namaki me na mai dolava talega na bose ni yasana vakaturaga o Tailevu ena macawa oqo o Baimarama, vakadeitaka na tikina oqo na liuliu ni bose vou ka se qai digitaki ga mai na Tabacakacaka i Taukei o Rusiate Tudravu.

More Stories