Vesu mai Idia ka laba e Viti

E SA vesu mai Idia e dua na tagane ka vinakati tiko e Viti e na vuku ni nona a labati na nona dau domoni ka a qasenivuli ni muri vuli e na 2009. A beitaki o Imshad Izrar Ali, e dua na pailate e liu, e na cala ni nona labati nona i tau o Rajeshni Sharma e na 2010.

A gole ki Idia ena Janueri ni 2011 e na i volatara ni curuvanua e na vuku ni tauvimate. A laki sivia na gauna yalataki ni nona tu e kea.

E a mani vesu mai vei ira na ovisa ni koro levu ko New Delhi ko Ali e na gauna era a vaqaqa tiko kina e dua na kisi ni nona tauri vakaukauwa e dua na goneyalewa ka qai tukuni ni rau a tiko vata kei Ali.

E tabaki koto e na tabana ni tukutuku na Indian Express ena i ka 20 ni Seviteba ni a qai kilai o Ali e na gauna era a vaqaqa tiko kina na ovisa na kisi oqo ka ratou qarava tiko na siteseni ni ovisa e Lajpat Nagar.

Ena nodratou i tukutuku na ovisa e na i ka 9 Seviteba, a tukutuku vei iratou na ovisa e dua na lewe ni koro e Manipur ni a tauri vakaukauwa na luvena ka a cakacaka tiko e na valenibula e Moolchand.

E kaya na DCP (Southeast) ko M .S. Randhawa ni a vakavuna mera vakamuria na ovisa na vanua e tiko kina na yalewa na veika e toboka na i taba (electronic surveillance) ka mani sereki mai e na dua na vanua e Masjid Moth. E a tiko vata kei Ali e na gauna ko ya.

E na gauna a vakatarogi kina ko Ali, era qai kila na ovisa ni a dua na pailate e Viti o Ali e na maliwa ni 2002 kei na 2007.

E na 2007, e a vakayacora e dua na qiri ni veivakarerei ko Ali ni na kacabote e dua na bomu e na loma ni dua na waqavuka. Era mani vakaraitaka na ovisa ni a qai totogitaki o Ali e na ruku ni Lawa ni Veivukayaki e Viti ena vuku ni cala oqo. A vakadinadinataka talega o Ali ni a vesu e na 2009 e na nona a labata na nona i tau e Suva. A mani soli vua na veivagalalataki mai na mataveilewai e na vuku ni i vakadinadina vakavuniwai. Sa vakadeitaka na valenivolavola ni Dauveibeitaki Raraba Vakamataniutu ( Director of Public Prosecutions) ni sa ciqoma na i tukutuku ni nona vesu o Ali mai vei iratou na ovisa mai New Delhi e na Lotulevu ni macawa rua sa oti e na vuku ni sa sivia na gauna yalataki ni nona tiko mai kea.

Kaya o na Dauveibeitaki Raraba ni Matanitu o Christopher Pryde ni ratou sa veitalanoa tiko kei na vakailesilesi mai Idia e na vuku ni nona vakauti lesu mai ki Viti me mai veilewaitaki e na cala ni laba. E beitaki tiko Ali ni a labati Sharma, yabaki 35, ka qai biuti koya matemate no e na nona vale e na gaunisala e Howell e Suva. a qai kune na yagona e na i ka 2 ni Noveba ni 2009.

More Stories