Veiwasei ena gunu yaqona

E LAURAI ni levu na turaga era dau laki wasea na veika era lako curuma ena gauna ni soso yaqona.

Oqo na veika e sa vakadikeva tiko mai na Lifeline Fiji, e dua na tabana ka qarava vakatabakidua na kena sagai me vakalailaitaki na kuna e Viti.

Tukuna o Jeremaia Merekula na i vakailesilesi liu ni Lifeline Fiji ka Vodafone ATH WoD candidate, ni oqori e dua na ka eratou vakadikeva ena nodratou gole ena veiyasai Viti.

“Ni tiko na naba ni talevoni, na 132454 kei na dua na tabana ni veiqaravi vakaoqo, e laurai ni levu sara na turaga era goleva mai ka ra doudou na wasea mai na nodra leqa,” e tomana o Merekula.

E kaya ni yabaki tolu sa oti, na gone e mai kauta tani na nona bula oya e dua na cauravou yabaki walu.

Vakabibitaka talega o Merekula ni ka bibi na noda dau ciqomi ira tiko na wekada era dau lesu mai valeniveivesu.

“E levu vei keda na i Taukei eda sa biliraki ira tani saraga na wekada ena gauna era sa laki qarava tu na nodra i totogi ena loma ni valeniveivesu.

“Na gauna era suka mai kina, eda sa beitaki ira tuga ena cala era vakacalai kina oya, ka sega na vanua me ra mai lomani ka tokoni kina,” e kaya o Merekula.

Vakabibitaka na noda veisautaka na noda rai na lewenivanua ka kidava tiko ke dua na wekada voleka e vaka e lomaleqataka e dua na ka.

“Esa ka bibi na noda wasea na noda leqa ka kauta donu,” e kaya o Merekula.

Ena siga Vakarauwai oqo, 22 ni siga o Jiulai ena qaravi tiko mai Nausori e dua na nodratou porokaramu ena valenilotu e CMF Harvest e Nausori.

“Ko ni sa kerei na lewenivanua ka tiko voleka e Nausori mo ni na yaco yani vakavoleka ena tekivutaki tiko na soqo oqo ena 7 na kaloko ena yakavi, ko ni sa kerei kina mo ni na yaco yani kina vakalewe levu.” e kaya o Merekula.

More Stories