Veivuke na Fulton Hogan vei ira mai Savusavu

ERA marau na gonevuli e Savusavu ena veivuke ka vakayacora na kabani na Fulton Hogan Hiways ena kena vakarautaki ki na Yaroi District School, Buca Government School kei St Bedes na nodra i yaya ni takoso e gaunisala na gone.

Oqo na kena soli na i sulu e dau daramaki na reflective vests, na cone, kei na i vakatakilakila ni takoso era dau vakayagataka na gonevuli ena gauna ni vuli mai na  siga Moniti ki na Vakaraubuka.

Kaya na manidia liu ni FHH o Solo Nabete ni qo e dua na nodratou sasaga ena kena sagai me vakalailaitaki na coqa kei na vakacalaka ena noda gaunisala e Viti, vakabibi na nodra taqomaki na luveda ena nodra gole ki vuli ka suka talega na vuli en veisiga.

Vakaraitaka o Nabete ni ka bibi na nodra taqomaki na lewenivanua kei na bula, baleta ni rawa ni yaco na vakacalaka ena dua ga na gauna.

E kuria o Nabete ni sa vakayacora tiko na nona itavi na kabani ena kena matata na vakatakilakila eso era tu ena gaunisala me rawa ni veivuke vei ira na draiva, na pasidia kei na lewenivanua raraba eda vakayagataka na gaunisala ena veisiga.

E vakaraitaka o Nabete ni ka bibi na nodra taqomaki ka karoni na gonevuli ena noda vanua.

More Stories