Veivuke ena vakaukauwa yago e Nadroumai

Oi kemuni nai matai ni Paraiminisita moni butuka na neimami koro ka i otioti ni vakailesilesi vakamatanitu e cake me gole mai ena neimami dela ni soso o Sir Robert Foster na Kovana kei Viti ena vasagavulu vakacaca na yabaki sa oti.

Oqori na mala ni vosa nei Malakai Vovi ena nona vakacabora tiko na kamunaga me qalova kina na Paraiminisita o Voreqe Bainimarama ena koro o Nadroumai mai Nadroga ena macawa sa oti.

Ea la?ki solia vakailoloma o Bainimarama nai yaya ni vakaukauwa yago ena koro o Nadroumai me nodra na kalavo ni rakavi na Tovolea ka dua vei ira na kalavo makawa ka vakarurugi tiko ena Iunioni ni rakavi e Nadroga.

E tukuna o Setariki Roiroi e dua na i vakailesilesi ena timi ni Tovolea, ni $12,000 na udolu nai sau vakailavo ni yaya ni vakaukauwa yago.

Ena vuku ni kalavo ni rakavi ni Tovolea, au sa cavuta kina na vakavinavinaka vakaitamera vua na turaga na Paraiminisita e noda vanua ena nodra dodo liga mai ena i yaya ni vakaukauwa yago oqo.

Oqo e dua na kalougata levu vei ira na cauravou dauqito rakavi e Tovolea, kana tosoya cake sara nai vakarau ni nodra qito ena veitaba yabaki sa tu e matadra, e kaya o Roiroi.

Na timi ni Tovolea era lewena tiko na cauravou ni koro o Nadroumai, Vunatovau, Silivalevu kei Togovere.

E vica nodra gone era sa vakarogoya sara na yaca ni nodra kalavo ka ra laki dara sara na seqeleti ni timi ni Viti me vakataki Aporosa Robe ka timi ni Viti ena yabaki 1964 ena gole ki Welesi, Esala Nauga na dauveivakatavulici ni timi ni Nadroga kei na Mataivalu ni Viti, Iliesa Ratuva, Jiuta Lutumailagi ka vakakina o Waisake Naholo ka lewena tiko na timi jabeni ni All Blacks ni Niusiladi.

E levu tale ga vei ira na lewe ni timi ni Nadroga ena gauna nikua, era rejisitaki tiko ena timi ni Tovolea.

More Stories