Veivakaroti

E RATOU sa vakaroti na timi ni Vodafone Fiji Bati me ratou kakua ni vakanuinui vakalevu ena gauna e ratou na sotavi Niu Siladi kina ena kota fainala ni qito ni rakavi tinikatolu ni vuravura (Rugby League World Cup) ena Vakarauwai qo.

Oya na i vakaro mai vua na dauniveivakatavulici ni timi ni Bati ko Mick Potter ena nona sega ni taleitaka na nodratou qito na cauravou ena veika e ratou vakaraitaka toka ena sota kei Itali ena Vakaraubuka sa oti.

E tukuna o Potter ni dodonu me ratou na cakacaka vata tale, ena gauna e ratou vakarau tiko kina me ratou vuka takoso ki Niu Siladi ena nodratou na la?ki qito tiko mai kea ena macawa qo mai Wellington.

E kaya o Potter ni sega ni vinaka sara na qito vei Itali ka dodonu me ratou na vinaka cake sara ke ratou gadreva me druka o Niu Siladi.

Sa siqema tiko o Potter ni ratou na cakacaka vata na timi ni Niu Siladi me ratou na laveta tale na nodratou qito ni oti na nodratou a druka vei Toga ena 28 kei 22 mai Hamilton.

E a kauwai sara o Potter ni ratou cala vakatinikava na Bati kei na nodratou totogitaki vakatinikadua ena sota kei Itali ena Canberra Stadium. Ia, esa vakaroti iratou na nona dauqito o Potter me ratou na vakavinakataka na nodratou i vakarau ni qito ena kena gauna totolo duadua. E a vakadinadinataka o Adam Blair na kavetani ni timi ni Niu Siladi na nodratou sa mai druka vei Toga ka ratou sa vakanamata vei Viti ena kota fainala.

E vakaraitaka ko Kevin Naiqama na kavetani ni timi ni Bati ni ratou sa vakarau yacova yani qo na gauna dredre ena sotasota ni vuravura ena nodratou na veiqedravu kei Niu Siladi ena kota fainala.

E tukuna o Naiqama ni timi kaukauwa o Niu Siladi ia e ratou sa tu vakarau me ratou na sota ni yaco mai na kena siga.

E rau na sota tiko o Niu Siladi kei na Fiji Bati ena veimama ni vitu na kaloko (7.30pm) ena yakavi ni Vakarauwai qo mai Wellington e Niu Siladi.

More Stories