Veivakalolomataki

E VAKARAITAKA o Taitusi Lulusini, e dua na turaga ni yavusa ena vanua o Yavuhahuna ena tikina o Cuvu mai Nadroga ni sa dua na veivakalolomataki levu e caka tiko vei ira na i taukei ni qoliqoli

Kuria ka kaya ni sega ni taleitaka na vakatulewa esa biuta na matanitu, oya ena kena sa vakatabui me dau soli e dua na uma ni lavo se i vakamalua vei ira na taukei ni qoliqoli mai vei ira na via kerea nodra laiseni ena kena vakayagataki nodra i qoliqoli.

Tukuna o Lulusini dina ni sa levu na veika vinaka esa cakava tiko na matanitu oqo ena vuku ni veivakatorocaketaki, ia, na vakatulewa me baleta na i qoliqoli e sega ni duavata kina.

Vei keimami mada na vanua e Yavuhahuna ka volai tu vakaivola ni keimami taukena na i qoliqoli ena baravi ni tikina o Cuvu, e tiko ena neimami loma ni qoliqoli na yanuyanu o Yanuca ka dabe tiko kina na otela levu taudua e Viti na Shangri La Fijian Resort, e sega ni dua na i lavo lailai keimami taura tiko ena nona vakayagataka tiko na toba o Cuvu na otela ena nodra vakasarasarataki na kai valagi.

Ia e rawata tiko kina na otela e sivia na milioni na dola ena veiyabaki me tekivu sara mai ena yabaki 1967, ena gauna ea tauyavu kina na otela oqo.

Sa dua na veivakalolomataki levu e caka tiko vei keimami.

Au kerea na matanitu oqo me raica vinaka tale mada na vakatulewa oqo, me kua ni guilecavi keda nai taukei dina ni vanua kei na i qoliqoli e Viti baleta e solia mai na Kalou na vanua oqo me noda ka meda taukena.

E sega ni ca na veivakatorocaketaki baleta e kauta mai na i lavo kina matanitu kei na nodra cakacaka na lewenivanua ia me kua ga ni vakatabakidua ki vei ira na vulagi kada guilecavi nai taukei, e kaya o Lulusini.Na i qoliqoli ni vanua o Yavuhahuna e tekivu ena daveta o Yadua ka yaco ki Nabaibai voleka ki Malomalo

More Stories