Veitaucici ni yabaki

ENA noda tabana ni Railesu e na macawa sa oti, e a talanoataki tiko kina na nodra a veitaucici na cauravou duikaikai, mai Nausori me yaco sara ki Suva.

E vakavinavinaka vakalevu na nomuni niusiveva oqo na Nai Lalakai ni se bulabula vinaka sara tikoga na turaga ka a talanoataki tiko, ka qaqa talega e na veitaucici o ya.

Na nona wilika ga na kena i talanoa ka a tabaki toka e na yabaki 1963, sa gole sara ga mai vakadodonu kina neitou vale ni volavola me mai talanoataka na veika e a yaco dina e na siga ni veitaucici.

Ni tei wilika sara mada yani na nona i tukutuku:

E vakamacalataka o Petero Aniti Navonu ni kidacala sara ga ni raica na kena i taba e na macawa sa oti, ka vakavuna na nona via lako mai me mai tara sara ga na we ni vako.

Ia, e vakavinavinaka na Nai Lalakai ni makutu talega o Navonu me dua na nona i talanoa lekaleka me baleta tikoga na veitaucici o ya.

E kaya na turaga ka sa yabaki 74 tiko e na siga nikua, ni gauna oya e se tu donu kina na nona i cegu, na i tuvaki ni yagona, ka ni se qai yabaki 20 wale tikoga kina, ia, e muri e a qai matataki Viti e na veivacu e na sotasota ni qito ni Pasifika (South Pacific Games) ka a mai vakayacori e na noda vanua, e na yabaki 1963.

Kuria o Navonu ni a tabaki e na pepa, ka kaburaki talega e na walesi ki vei ira na cauravou era via vakaitavi e na veitaucici o ya, e dodonu me ra dui kauti ira ga yani vakataki ira e na siteseni ni ovisa mai Nausori.

Tomana ni rauta toka e 100 vakacaca na cauravou era vakaitavi e na veitaucici e na mataka ni Siga Tabu oya.

E kaya o Navonu ni viavia rugurugua toka vakalailai na mataka ni Siga Tabu oya, ka ra sa yatuni tu na cauravou e na mata ni siteseni ni ovisa mai Nausori.

Na gauna ga e sa cabolo kina na dakai, vaka ga e vakuru na kurukuru na domo ni nodra vava ni cici e na kena sa rorogo e na dela ni wavu na Rewa Bridge, e na nodra sa veitautaka na tai ni wavu me gole vaka ki na nodrai tikotiko na luve ni yali mai Dilkusha e na nodra sa gole mai ki Suva.

E kaya o Navonu ni sa bau sagasagai ira dredre na veitaucici vata tiko e na siga oya, ka ni levu vei ira era sa dau vakaitavi makawa tiko e na veitaucici ka vakayacori tiko e na siga lokuci.

?Me vaka ga ni?u se qai ciciva vakadua, au sa kaya lo toka e lomaqu, niu na tovolea sara vakaukauwa e na noqu i gu, me?u na rawata na veitaucici, ka ni sega ni dua na ka e dredre e na ruku ni vuravura oqo,? e kaya.

Tomana o Navonu ni voleka ni ra cici vata tikoga mai Nausori, ka sega ni dua e bau lutu, e na nodra veisisivitaka tiko mai se o cei e na taura na i cocovi e na siga oya.

?Na gauna sara ga keimami sa yacova mai kina na bucabuca e Koronivia, na vanua ka ra teitei tiko kina na gonevuli ni FNU e na gauna oqo, au sa kaya lo e lomaqu ni delana ka tiko oqo e matai keimami, au sa na biuti ira kina i muri na i lala keimami cici vata tiko mai qo.

?Vakaga e vanataki cake na rokete niu sa ciciva cake na delana ko ya, ka vanua talega o ya keimami sa veiyawaki kina ka qai muri au tikoga mai e dua na cauravou me yacova sara ni keirau sa yacova mai na Tauniolo Makawa e Suva,? e kaya.

E kaya o Navonu ni gauna era sa yaco mai kina na vo ni cauravou sa qai mai soli na nodra i cocovi, me vaka na bilo na i vakatakarakara, na  kaloni, na i yaya ni torotoro kei na vuqa tale.

Tinia na turaga ni Rokovuaka, Nalawa e na yasana o Ra oqo, ni i naki levu ga ni nodratou vakarautaka na i soqosoqo ni lave ka bi na (Chairmans All Races Club) na veitaucici e na yabaki o ya me rawa ni laurai tiko kina na i tuvaki ni yagodra na cauravou.

E vakavinavinaka talega vakalevu o Navonu ki vua na Kalou na Dauniveibuli, ni vakabalavutaki tiko na nona bula me yacova mai na siga nikua, me rawa ni mai veibulagoci tale yani ki vei kemuni na lewe ni vanua, ka ko ni dau taleitaka na wilika na noda niusiveva na kawa i Taukei, na Nai Lalakai.

More Stories