Veisiko o Usamate vei ira na noda mai Niu Siladi

ERA cauraka na wekada era cakacaka tu mai Niusiladi ena ituvatuva ni matanitu na veika era sotava tiko, ena vuku ni veiqaravi ena i teitei ni vuanikau kei na kakana draudrau mai keya.

Era  marau vakalevu na nona sikovi ira yani na Minisita ni Cakacaka, o Jone Usamate ena macawa sa oti ka rawa ni laki vakadinadinataka na veika e ra lako curuma na noda era a gole tiko ena i tuvatuva ni matanitu o Niusiladi kei Viti.

Era vakaraitaka na nodra kauwai ena vuku ni vanua era vakatikori kina, na kedra i sau, kei na sau levu ni veilakoyaki.

 Era raica talega ni duidui na i sau era ciqoma ena nodra waqanivola.

Era gadreva talega me ra na vakamatautaki rawa ena dua na yalava ni veiqaravi ni bera ni ra laki qarava tale e dua na cakacaka.

Vakadeitaka o Usamate ni dodonu me na vakavinakataki na tikina oqori, ka me sa vakayacori ga na veidinadinati ena vuku ni cakacaka vakaoqo, baleta me rawa ni ra vakarautaki ira vinaka na tamata cakacaka ena veika ena gadrevi me ra na cakava.

E a tiko o Usamate ena dua talega na bose ka ra sota kina na itaukei ni cakacaka, ka vuqa na i tukutuku oqo era laki veitalanoataka.

E mai vakananumi talega ena yabaki oqo na i ka tini ni yabaki e  mai veisemati kina na matanitu o Niusiladi kei na matanitu ena Pasifika ena nodra vakacakacakataki na lewenivanua e na Pasifika ena veiqaravi ena tabana ni teitei mai Niusiladi.

Vakadeitaka o Usamate ni sa taura talega na nodratou yasa ni veitalanoa na i taukei ni cakacaka, ka dua na bolebole levu talega na nodra laki vakamatautaki ira na noda ena dua na vanua vou kei na vanua ni veiqaravi vou era se vulagi kina.

Ena vula rua sa oti, e sa mai kacivaka raraba na minisitiri e vica vata na tikina,kei na koro era sa mai vakatabui tiko na lewenikoro era sema kina ni ra na sega ni digitaki ena porokaramu ni veivakacakacakataki oqo ki vanua tani.

More Stories