Veisiko o Ro Kepa

Update: 10:52AM

ENA nona veisiko voli na i Liuliu ni To ni Veisaqa, o Ro Teimumu Kepa ena Vualiku kei Tailevu, a raica ni levu na veikoronivuli mai keya e se bera tikoga ni vakacokotaki.

E na dua na ripote e biuta vata na Marama Bale na Roko Tui Dreketi, vakaraitaka ni se bera ni vakacokotaki na koronivuli mai Dawasamu Secondary School- ka ra vuli tale tikoga ena loma ni vale laca ena gauna oqo.

E vica vata na koronivuli mai na Vualiku kei Tailevu a sikova o Ro Teimumu ena Tusiti, 11 ni siga ni vula o Okotova ka dikeva rawa ni se levu sara na cakacaka ni veivakacokotaki me na vakayacori ena nodra vukei na lewenivanua.

E tauri rawa ena i tukutuku, ni sa laki vakadikeva na matanitu o Idia na kena vakavinakataki na koronivuli oqo mai Dawasamu, ka tiko ena $400,000.

Mai Koro, mai Vanuabalavu,era se waraka tikoga na lewenivanua kei ira na gonevuli na kena vakacokotaki na nodra koronivuli.

Vakadeitaka talega mai o Kele Leawere, na lewe ni palimedi mai na i To ni Veisaqa ni sega ni dua na itukutuku matata eratou taura rawa ena vuku ni tuvatuva e sa biuta koto na Minisitiri ni Vuli

�Vei au, e sa sega ni ratou raica tiko na Minisitiri ni Vuli na veika e dodonu me liu, ka me na vakavinakataki ni bera ni na qai kau tale mai na � tablet� vei ira na Fomu Ono.

�E ka bibi tiko na nodra vakacokotaki taumada na veikoronivuli kei na vanua era vuli kina na luveda,� e kaya o Leawere.

Vakadeitaka mai kina niusiveva oqo ena macawa sa oti, na Vunilewa ni Tabana ni Bula Raraba o Vuniwai Jo Koroivueta ni sa vakayagataka oti na matanitu e rauta ni $86 na milioni ena cakacaka ni veivakacokotaki- oqo vei ira madaga na 23,000 na lewenivanua era mai vakacacani na nodra veivale.

Ia na i tuvatuva ni matanitu ena veivakacokotaki ena tuvatuva ni lavo ena yabaki vou oya e $20 na milioni.

More Stories