Veisiko na i tabagone ena vei koro

Update: 10:37AM ESA vakadeitaka na Tabana ni Tabagone ni rau sa vakadonuya tiko na koro o Nakini mai Naitasiri kei Galoa mai Serua me ra na gade yani kina na itabagone ka ra lewena voli na porokaramu na Ship for World Youth Leaders.

Na porokaramu oqo e na vakaitavi kina o Viti, ena nodra sa siko mai e na yabaki oqo.

Ena gauna oqo e sa tomani tiko na veitalanoa kei ira na ivakailesilesi ni mata ni matanitu mai Japani kei iratou na Minisitiri ni Tabagone ena nodra na gade mai na i tabagone mai na veiyasai vuravura ena waqa na MV Nippon Maru.

E rauta ni 200 vakacaca na i tabagone era na tadu mai ena noda matasawa e Viti ka ra gole mai ena 11 na matanitu e vuravura.

Ena yabaki 2011, a mai kele e Viti na waqa oqo ena porokaramu vata oqo, ia eda kalougata ni sa digitaki tale na noda matanitu me na mai kele tale kina na waqa oqo kei na wavu mai Okaladi ena porokaramu yaga oqo nodra na itabagone ena yabaki oqo kei na yabaki ka tu mai.

Kaya mai na i vakailesilesi ni tabana ni Tabagone, o Joni Vatuvatu ni nanumi tiko mera na vakasarasarataki na i tabagone oqo ena koro e rua oqori kei na tolu na koro me rawa ni ra mai lewena ka tiki ni dua na koro kei na veika e dau qaravi ena Siga Tabu.

Era na mai kana lovo talega na i tabagone oqo ena nodra vukei tiko me ra mai sarava ka vakadinadinataka na draki ni bula dina vakaitaukei kei na kakana eda dau kilai tani kina.

Era sa maqusa tiko ena gauna oqo na vakailesilesi ni tabana oqo mai Japani kei na matanitu e Viti ena kena laurai me na qaravi vakavinaka na soqo oqo kei na sala ni noda rawa ni maketetaki keda e vuravura na vanua.

More Stories