Veisemati lesu ki dela ni yavu

NA i naki levu ga ni soqosoqo oqo sa i koya na kena vakalesui tale o ira na kaivesu ki na nodra dela ni yavu me rawa ni ra kua ni lesuva tale na bula vesuki era a tu mai kina e na dua na gauna balavu.

E vakadeitaka tiko mai na i tukutuku oqori ko Watisoni Raikadroka na Roko Veivuke e na yasana ko Namosi e na soqo ka a vakayacori e na otela ni saravanua na Pearl Resort mai Pacific Harbour e na i ka 29 ni siga ni vula sa dromu.

E kaya o Raikadroka ni qo e se qai matai ni veivosaki me vakayacori e na yasana o Serua kei Namosi me baleti ira na gone ni yasana o ya ka ra curu tu e na vale ni veivesu.

Tomana ni tiko e dua na “Care Committe” mai na loma ni vale ni veivesu, ka i tuvatuva tale tikoga ni matanitu.

Ia, na komiti oya e ratou na qai cakacaka veivolekati sara kei na Yasana, lutu sobu ki na Tikina, lutu sobu sara vei turaganikoro, na Mataqali, me yaco sara ki na vuvale nei koya na cauravou se turaga se marama ka tiko e loma.

E kaya o Raikadroka ni oqo e se qai kena i matai me vakayacori e na yasayasa oqo, ka ni dua na i wiliwili levu ni kaivesu era vukei mai na yasana o Cakaudrove.

Kuria ni i naki levu ni komiti o ya me ra raici ira na gone ni Serua kei Namosi era se tiko e loma ni vale ni veivesu, tarogi na yabaki cava era na suka mai kina e na gauna era sa cakacakataka oti kina na kedra i totogi. Na vanua oya e ratou na qai cakacaka kina na komiti ka sa bucini rawa tiko yani e nakoro kei iratou na komiti ni vale ni veivesu.

O iratou na ovisa ni vale ni veivesu e ratou na gole ki nakoro ka ra lai vakayaco bose vei iratou na mataqali, turaga ni koro kei na vuvale, ke sa tiko e dua na tiki ni qele, era sa na teivaka rawa tiko na tiko mai dela ni yavu, me qai suka yani o koya na gone ka tiko e loma, sa voleka tale tu ni matua na nona iteitei.

“Na vanua o ya e na sega ni cakava tale kina na kaivesu oqo e dua na ka baleta ni sa kila o koya ni sa ciqomi koya na nona koro dina, nona mataqali ka vakabibi na nona matavuvale.

“Kena i lutua ni sa raica o koya na cauravou se tama ni gone ka curu mai tuba ni sa na voleka tale tu ni matua na nona teitei.

“Qo sara ga na i vesu e na vesuki ira na lesu mai tuba, ka ra na sega ni via la?ki kana moce tale tiko ki loma,” e kaya.

Tomana ni gauna e sa suka yani kina e dua na kaivesu i nakoro, e sa na qai la’ki tuberi koya talega na i Vakatawa ni Lotu me rawa ni dei kina na nona tiko ka na guilecava vakadua na vanua e se qai lesu ga mai kina.

E kaya o Raikadroka ni o ira na curu tiko e loma e na nona i tavi talega na komiti ka tiko mai nakoro me na dau sikovi ira na nodra veitinani era tiko e nakoro, na kedra kakana, na sovu ni sili, era na veivuketaka na nodra qaravi na gonevuli kei na veika lalai tale e so. Na veika o ya e na la’ki vakaleleci sara vei nodratou Tata me rawa ni kua ni lomaleqa kina, ka saga ga vakavinaka na kena i totogi, me rawa ni suka vakatotolo i vale.

E kaya na Roko Veivuke e na yasana o Namosi ni sa tiko talega na nodratou i tuvatuva me ra na laurai na sa mai tu vakadede i na veitauni e na noda vanua, ka me rawa ni ra vakayarayarataki lesu tale ki na nodra dui dela ni yavu.

“So e se gole sara tu ga mai na tukadra, tamadra, yaco mai vei ira na i taba e na gauna oqo, ka ra sa bula tu ga e tauni.

“E na neitou cakacaka vata na vale ni volavola ni yasana, Mata ni Tikina, kei ira na turaga ni veikoro, keimami sa na saga me ra kila tale mada o ira na i lala oqo na nodra yavutu dina.

“Sega ni rawa ni dua e vesu me qai tukuna tiko ni gone ni tauni, e na tukuna tikoga na yaca ni nona yasana.

“Oya na vuna keimami sa veitauriligataka sara ga kina na cakacakataka yaga oqo me rawa ni rogo vinaka kina na yasana o Serua kei Namosi, ka vakabibi e na vakalailaitaka na nodra curuma tiko na vale ni veivesu na gone ni yasana o ya,” e kaya.

Sa nuitaka tu o Raikadroka ni na vakavotukanataki na sasaga yaga oqo ni bera ni qai veitosoyaki yani e na veiyasana e na noda vanua na i naki ni cakacaka vata vakaoqo.

More Stories