Veisele o Isireli

Update: 9:51AM ESA vakadeitaki e lewe 20 na lewenivanua e Viti me ratou na qaravi ena veisele vakavuniwai mai vei ira na kena dau era gole mai. Isireli ka sa tekivutaki tiko ena Tusiti ni macawa oqo

Eratou a yaco mai Viti na mata timi oqo, lewe tolu na vuniwai dauveisele kei na dua na nasi ena kena qaravi o ira na gone e leqa na daligadra, na ucu, kei na domo.

E na siga Moniti, era sa vakadikevi oti e rauta ni 35 na gone kei na vica na qase ni bera ni na qaravi yani na veisele vakavuniwai.

E vakayacori tikoga na veisele vakavuniwai oqo ena valenibula levu e Suva, ka cakacaka veivolekati kei na Tabana ni Bula ena noda vanua.

O iratou na i lawalawa oqo eratou tadu mai ena noda vanua ena yakavi ni Siga Tabu, ka ratou na mai veiqaravi tiko ena loma ni tini na siga.

Kaya o Yaron Sultan- Dadon na daunivakasala ena Pasifika ni o ratou na i lawalawa oqo e ratou lewena tiko  na porokaramu na Mashav, ka tiki ni liga ni veiqaravi ni matanitu o Isireli ki na veivanua tani.

Ena i tuvatuva oqo, e vukea ni rauta ni 60 na veimatanitu e vuravura ena kena vukei me kau laivi na leqa e sotavi vuravura me vaka na dravudravua, na tauvimate kei na via kana.

E na namaki talega me na laki sota kei na Peresitedi ni noda vanua, Joji Konrote na mata ni matanitu mai Isireli ena macawa oqo.

Vakadeitaka talega o Sultan- Dadon ni loma ni 10 na siga ni nodratou veiqaravi na kena dau oqo, eratou tuvalaka tiko me ratou na veisele vei ira e lewe 70 na tauvimate.

Eratou vakadeitaka ni o ira ga na kisi bibi eratou na qarava tiko me vaka na veidinadinati kei na veitalanoa eratou sa cakava tiko kei na  vakailesilesi mai na Tabana ni Bula ena noda vanua.

More Stories