Veikilai ena soli ilavo

ERA sega ni vakila na mimiri ni uca ena mataka lailai ni siga Vakarauwai na i ka 31 ni siga ni vula sa dromu, na Vola Kawabula, vasu, kei ira na vakawati yani ki na koro ko Vanuaso, e na nodra sota yani ki na soli bole, ka a vakayacori e na koronivuli na Nabua Primary School.

E vakaga eda sarava e dua na loga ni veisenikau dui roka ena totoka ni nodra kalavata na dui yavusa e na nodra sa dabedabe  laka na yavusa, e na gauna ni soli.

E vakamacalataka o Sivorosi Tora na i liuliu ni komiti ena vanua ni cakacaka, ni i naki levu duadua ni soli, sai koya na kena tara vou e dua na nodra valenilotu mai dela ni yavu.

Tomana ni sa yabaki 104 na nodra valenilotu ka tiko e na gauna oqo, ka ra se wakia vata na lase me vakaukauwataka na kena lalaga.

Au a salavata kei na rua na Idinia lelevu ni tara vale e na vica na yabaki sa oti, ka rau vakasalataki au ni sa dodonu me na vagalalataki na valenilotu makawa, baleta ni sa oti sara tiko ga mai na kaukauwa ni lase.

Yabaki sa oti ga keirau a lako vata tale kei na dua na Idinia ka tukuna o koya ni kena gauna totolo duadua me sa veisau kina na neimami valenilotu, kaya o Tora.

Kuria ni vuna gona oya, era sa veivosaki kina na lewe ni koro me sa na tekivu na soli bole ka me ra tauya $1000 dua na turaga se marama.

E kaya na turaga yabaki 47 oqo, ni dua na soqo lagilagi ka totoka, era a cakava e na siga Vakarauwai ka ra rawata kina e sivia ni $10,000.

Vei au e veitalia mada na soli, au vinakata ga me keimami mai sota madaga ka veikilai.

Na gauna keimami sa na veikilai kina, e sa na qai tarava mai na neimami veilomani, ka sa na qai taladrodro ga mai na soli, kaya o Tora.

Tomana ni mua ni yabaki sa oti era a kumuna rawa kina e sivia na $13,000, ni soqoni vata na soli e na Vakarauwai sa na vovolekata yani na $24,000.

Ia, na soqo e na Vakarauwai e sa bula dina na soli ka ni salavata toka na kamica ni domo ni sere, ka taviraki vakavinaka na vuloa ni koronivuli.

Kuria o Tora ni 4 tiko na yavusa e na nodratou koro ka okati kina na yavusa Turagalewena, Qalilevu, Qalitu kei na yavusa Nasoqo, ka ratou vulagi talega e na soli e na siga oya o iratou na i liuliu ni yavusa e 4 ka sa volai no oqori e cake. E marautaka talega vakalevu na soqo e na siga oya o Sitiveni Vai, e dua vei iratou na turaga ka ra gole mai vanua, e na nona vakadinadinataka na veitokoni era veitauriliga tiko kina na tiko e na vanua ni cakacaka, ka kaya kina vaqori ne,Kevaka e sa vaka tu oqo na talairawarawa ni luvei Vanuaso e na vanua ni cakacaka, au sega ni vakabekataka ni na rawa vakaidina na i naki ni noda sasaga

Tomana o Tora ni sa toso tikoga na soli vei ira e vakauqeti na yalodra e na sasaga yaga ka ra a se tekivuna mai na nodra qase, ka na dua tale na nodra sota e na vula ko Okotova ni yabaki ga oqo.

E a dua talega na nona cau o Anitela Mateisuva na daunivakasala ni koro o Suva, ka vakamacalataka ni o ira na tukadra era a tauyavu e na sega, ia, na kaukauwa ga ni lolo kei na masumasu, e a duri rawa kina na nodra vale ni Kalou.

Sa nuitaka tiko o Tora ni qai yacova yani na Siganisucu ni yabaki mai oqo (2019), era sa na dolava kina na katuba ni nodra valenilotu vou mai delaniyavu.

Kivei kemuni ga na wekada ko ni via kila na veika matailalai ni sasaga ka sa vakacagau tiko e na gauna oqo, kerea mo ni qai sema ga yani ki na i volamata (facebook) ni Vanuaso Village Church Project, tinia o Tora.

More Stories