Vakatikori na Komai Burecagi

E kune votu na duavata ena loma ni Mataqali o Burecagi ena siga ni veivagunuvi vua na nodra Turaga ni Mataqali.

Na Mataqali o Burecagi e nodra Bati na Turaga na Tui Vadra ina loma ni Yavusa o Narocake ena Vanua o Noco. Era marautaka na lewenimataqali nira sa qarava rawa na nodra itavi ni veivakatabui vua na nodra iliuliu.

A qarava na kena lotu na turaga na Qase ni Lotu ni koro o Narocake ka ratou veitabaki na qase ni Mataqali me ivakaraitaki ni nodratou sa tu vakarau ena kena colati na ivua ni veiqaravi ena loma ni Mataqali vaka kina ina Yavusa o Narocake kei na Vanua o Noco.

Era sa veiliutaki tu mai ena dua na gauna balavu o Timoci Arusanotu ena i tutu vaka Komai Burecagi ni bera ni vakanananutaki me kerei cake ina valenivolavola ni Yasana o Rewa na kena gadrevi me vakadeitaki vakaivola me vaka na sasaga ni Matanitu, oya mera vakatawani na itutu vakavanua era lala tu.

Ena nodra ivola ni veivakadeitaki ina itutu oqo na Turaga na i Liuliu ni Veitarogivanua kei na Wainiqoliqoli ko Ratu Isireli Vananalagi Vesikula, a wilika na Turaga ni Koro e Narocake o Adriu Rakai ena gauna ni veivakatikori e vaka koto qo – ?Na itutu oqo e itutu dokai ena noda bula vaka Vanua ni tutu ni veiliutaki. Ena gadrevi kina na veiliutaki vaka dauniveiqaravi ena nodra qaravi na nomuni lewe ni vuvale vanua.

Au sa tataunaka na nodra bula na vakarorogo ena nomuni veiliutaki. Mo ni qai raica na nodra liutaki vaka matau kei na nodra tiko vinaka ena veisiga. Mo ni maroroya na nodra bula na lewe ni nomuni vuvale mera kua ni lako sese se yali mai na vuvale. Na itutu kei na itavi o ni kacivi kina e i sosomi ni tutu kei na itavi va- Kalou e vuravura. Ena veivuke sara vakalevu na nomuni semati kemuni vua na noda Turaga me dau vosa vei kemuni ena itavi bibi oni sa kacivi kina oqo?.

Ena vosa ni tubetube ni veitataunaki a vakabibitaki kina na nodra kila na Turaga ni Mataqali na nodra itavi vei ira na lewe ni mataqali vaka kina ki na Vanua. Ea kerei mera dau kaciva wasoma na bose vanua ni Mataqali me rawa ni dau veivosakitaki kina na veiulutaga bibi me taqoqo ka qaqaco kina na i sema vakavuvale. Mera dau vakasalataki kina na lewe ni vuvale vanua e Burecagi mera kilai ira kei na nodra itavi, mera dau bulataka na bula ni vakarokoroko kei na veidokai, na nodra dau nanumi na malumalumu na tauvimate kei ira na luveniyali, vaka kina na nodra vakananumi ena nodra vakacurumi na gone ina i Vola ni Kawa Bula kei na nodra bokoci na mate. E kune votu nira sa tu vakarau na lewe ni mataqali mera qarava na nodra itavi ina Vanua, na Lotu kei na Matanitu ni sa mai vakatawani na itutu ni veiliutaki.

More Stories