Vakatatabu ni oti e tolu na yabaki e Viwa

ERA a osota yani na rara ni koro o Viwa na kena Tabacakacaka e na mataka lailai ni Siga Tabu e na macawa sa oti, e na nodratou a la’ki bokoca kina na nodratou cina na lima na Tabacakaca Vakaivakatawa.

O iratou na Tabacakacaka Vakaivakatawa e okati kina ko Viwa, Dravuni, Nakalawaca, Naikawaga kei na vica na vuvale mai Naisaumua.

E a tekivuna na lotu na i Talatala ni Tabacakacaka ko Viwa, soli vunau na Vunivola Levu ni Lotu Weele e Viti kei Rotuma o Talatala Ili Vunisuwai, ka tinia na lotu na i Liuliu ni Veivakalotutaki o Talatala Samuela Koroi.

Ni oti ga na kena wiliki na lesoni, era sa qai gole mai na lewe ni Tabacakacaka ko Viwa, ka ra dui mai bokoca na nodra dui cina.

Sa oti vakavinaka oqo e tolu na yabaki na nodra vakawaqara tiko na cina kei na nodra masumasu tiko e na nodra dui Tabacakacaka.

E totoka na i rairai ni vanua ka solia mai na Kalou na draki ni soqo e na siga o ya.

E kaya o Vunisuwai ni gauna e sa mai boko kina oqo na cina, e sa na caudre ka rarama tiko na vosa ni Kalou e na loma ni utodra, ka na vakaraitaki e na nodra i vosavosa kei na nodra i vakarau.

E kaya o Vunisuwai, ni tuvatuva ni vakacabe rarama e lako tiko oqo e na loma ni Lotu Wesele, e a se tekivu sara mai e na yabaki 2005.

E kaya o Vunisuwai ni a tekivu talega e na yabaki ko ya na Veiqaravi Bole, ka i naki levu ni veiqaravi bole, a ya, na kena vakasosataki tale ko Viti e na i tukutuku vinaka ni Gone Turaga ko Jisu Karisito.

Tomana ni sa vuqa sara na veika lelevu e tara tu na noda vanua e na gauna oqo me vaka na kucu, na laba, dua na tukani gone se tama ni gone e kucuva tale na luvena dina ga.

Ia, e vakabauta tu na lotu ni oqo ga e dua na gaunisala e rawa ni tara kina na yalodra na tamata na rarama ni Kalou ka rawa ni tarovi kina na veika rerevaki e sa tara tu na noda Viti raraba e daidai.

“Na kena waqa tiko gona ni vakalele na vakacabe rarama, me vakaibalebaletaki e na vei ulutaga e 5 au sa tukuna oti, a ya na Kalou na rarama, Jisu na rarama, na nona vosa na rarama, o ira na sa cilavi na nodra bula e na vakabauta, era sa kacivi tu me ra vakadewataka yani na rarama, ka’u vakabauta ni tiko kina na kaukauwa ni Kalou me veisautaka na yalodra na tamata, ka veisau sara talega kina na nodra i tovo.

“E da na vacu cagi e na sasaga e na noda via valuta tiko na i tovo ca e na noda vanua, e vakabauta tu na lotu ni vanua duadua ga o ya e na rawa ni talai kina na yalodra na lewe ni vanua.

“Na vuna e tekivutaki mai kina ki na koro ko Viwa, na vakacabe rarama, baleta ni a tekivu ga mai kina e na gauna taumada, ka sa roboti Viti tu e na siga e daidai, ia, oqo e sa i karua ni uwa ni veivakararamataki e sa kalawaca yani na lotu e na gauna oqo,” tinia o Vunisuwai.

More Stories