Vakasobuduru ni Valenilotu

NA NODA Railesu e na macawa oqo e da na wilika kina na vakasobu duru ni Valenilotu mai Nabobuco, e Naitasiri.

Ni wilika sara yania na i tukutuku ka a tabaki e na Na i Lalakai e na yabaki 1981:

Ena ruku ni ulutaga oqo, keitou sa na kauti kemuni cake mada ki na loma ni vanua ko Viti Levu, e na vanua ka ratou la?ki veiyala kina e tolu na Yasana lelevu mai na vanua ko Naboubuco e na koro ko Naqelewai.

E na dua na yasai Viti ka vakilai kina na dredre ni bula vakailavo, tarai ira na dredre ni veilakoyaki ka maucokona tu vakavinaka na nodra i sema kece sara vakaveiwekani.

Dina ni vaka tu oqo na i vakarau ni bula e na kena dredre, e sega ga ni tarovi ira e na nodra sasaga ni veivakatorocaketaki.

Era sa vakaduria oti e dua na nodra valanisoqo ka vakakina na nodra valenivuli, me baleta na vanua ko Naboubuco, ka nunumi tiko me dola na vale oqori e na Lotulevu sara ga nikua na i ka 11 ni Jiune.

Ia, e na dua talega na sasaga ka ra sa vakaogai ira tiko kina na lewe ni koro ko Naqelewai, e vakaraitaka mai kina ko Milasiga Koroi, na i talanoa ni dua na vakasobuduru cecekia me baleta na nodra Valenilotu Vou.

E vaka koto oqo na i tekivu ni i talanoa nei Koroi:

E na siga Tusiti na i ka 26 ni Me, e na bau dua toka na siga guiguilecavi dredre vei keimami na lewe ni vanua oqo, e na kena vakavatukanataki e dua na sasaga, ka taura e vica vata na yabaki, salavata na dredre ni veika keimami sota kaya.

E na siga oqori e a vakaduri kina na vale ka na vakatabakiduataki kina na nona qaravi na noda Kalou, ni sa i koya na i takataka ni neimami vakalougatataki.

Kaya o Koroi ni mai na mua ni yabaki sa oti e sa qai vakarawarawataki na nodra sasaga e na kena sa yaco yani e na yasayasa o ya na gaunisala ki na i sucusucu ni livaliva mai Monasavu.

E vakamacalataka mai ko Koroi ni koro oqo ko Naqelewai, e koro nei Ratu Joni Lecia se ko Daudakai.

Na turaga oqo, e solia vei koya na kaukauwa se na sau ni vanua ko Nabobuco me taqomaka.

Sai Daudakai talega e takosova mai na veitokaitua kei Nalawa, siro sara yani ki barabvio me la?ki kauta mai na i sulu ni lotu mai na yanuyanu ko Bau.

Sa i koya talega oqo e rau veiwekani voleka sara kina na vanua ko Nabobuca kei Nalawa.

E na kena kau tikoga mai na vakasama ni veivakararamataki oqori, e ka dokai dina kina na vakasama ni kena mai duri tale e na koro oqo na nona vale ko Koya ka a vakaisulutaki ira na lewe ni koro ko Nabobuco me kua ni rairai na noda luvaiwale e na gauna ni butobuto oya.

E na siga ni vakasobuduru era kalougata vakalevu na lewe i Nabobuco e na nona yaco mai na i Talatala mai Nakorosule, ka mai liutaka na i tavi e na soqo ni vakasobuduru.

Era tiko sara vakalewelevu na turaga kei na marama lewe ni veikoro, ko ira na Mataivalu ka ra vakaitavi tiko e na tara ni koronivuli e Nabobuco.

Ni bera ni sobu na duru, e a tauca e dua na vosa bibi ka vakavure vakanananu ko Ratu Sakiusa Navakaroko ka vakayatuyatutaka kina, na i tekivu ni kena kau mai na i sulu, na gauna balavu e kumuni tiko mai kina vakamalua na i lavo me yacova sara mai na kena sa vakarau mai vakavatukanataki na nodra sasaga.

Na bibi kei na vakaciriloloma ni vosa vakaturaga oqo e vakatubu yalo luluvu ka turu na wai ni matadra na lewe ni vanua ko Nabobuco.

Oti oqori sa qai vakayacori na cakacaka vakalotu ni kena vakasoburi na duru.

Era marau na lewe ni vanua, ka ra reki vakalevu cake sara ko ira na sa qase sara ni sa qai mai laurai tu na vatuka ni nodra sasaga mai vakabalavu.

E sa qai muria yani oqori na kena vakayagataki e dua na magiti levu kei na wai ni vanua ka ratou vakarautaka na vuvale turaga kei ira na nodratou vasu me marautaki kina na siga lagilagi ko ya.

E na nodratou veiqaravi oqo na turaga, sa qai vauci ira vata ga na lewe i Nabobuco e na dua na i vau kaukauwa ni veiwekani ka me sa vakacerecerei ga kina na Tamada Vakalomalagi.

E vakacaucautaka vakalevu ko Koroi kei ira na lewenivanua ko Nabobuco na i gu ka tiko vei rau na veiwatini ni Mereke lewe ni Peace Corps, ko Sitiveni kei Daiana ka rau cakacaka tiko e na yasana o ya.

E vakaitavi ko Siti e na vakarautaki ni droini ni valenilotu kei na valenisoqo ka rau veivuke sara talega vakalevu e na kena vagolei mai e $6,000 mai na nodra i soqosoqo na Peace Corps.

E rau sa na biuti Nabobuco tiko na veiwatini oqo e na Vakarauwai sara ga oqo nai ka 13 ni Jiune ka sa ka mosimosi dina na nodrau sa mai biuti ira na lewe i Nabobuco ni oti e rua na yabaki na nodra veikilai, veilasamaki, cakacaka vata ka veilomani.

More Stories