Vakasakiti dina

ESA mai cava na sotasota ni Singapore 7s ena qito leyavitu ka levu era se veitalanoataka tu ga na vakasakiti ni qito eratou vakaraitaka na noda cauravou.
Eda vakavinavinakataka na i vakarau ni qito eratou a vakayacora me tekivu mai ena qito vakatobu me laki yacova sara na fainala ena nodrau sota vata kei na timi ni Ositerelia.
E da marautaka talega ni ratou sa cabeta cake sara na i tutu ni naba dua na nodatou mata timi ena 145 na poidi, ka sa karua tiko na mata timi ni Sauca Aferika.
Ia, eda sa marautaka dina na nodratou cabeta mai na kotafainala, na semifainala na noda toa ni vala ka ratou solia kece na nodratou i gu ena veiqito kece eratou vakayacora.
E dau dua na marau e yaco ena noda vanua ni ratou dau qaqa na noda mata timi, ena veivuvale kei keda na lewenivanua baleta ni da dau vakamuria tu na nodratou qito na noda cauravou ena vuku ni sotasota ni HSBC World Rugby Sevens Series ni yabaki oqo.
Ia, sebera ni sivi na koro me da na qai kalu, ena kena namaki tale e rua na sotasota mai Lodoni kei Parisi ena vula o Jiune.
Eda vakavinavinakataki iratou na cauravou ,na timi ni dauniveivakatavulici kei iratou na timi eratou cicivaka tiko na mata timi le yavitu ni noda vanua.
Eda vakavinavinakataka talega na veitokoni vinaka eratou vakayacora na nodratou dui vuvale na timi oqo, era dau veitokoni tu vei iratou na cauravou, ena vuku ni nodra dau laki keba, na nodra vakaukauwa yago ena vuku ni kena valataki tiko na noda vanua ena buturara ni rakavi ena noda vuravura.
E na tabetabe ni macawa oqo, ko ni na wilika tiko kina na italanoa ni veika e yaco ena gauna e liu mai Bua ena nona a vakamatei o Charles Savage mai Bua.
E dua talega na italanoa mai Navakasiga ena nodra vakayagataka vakavinaka na nodra kila ni tali ibe na marama ka sa rawa tiko kina na nodra i vurevure ni lavo na nodra marama.
Kena i karua e vakabulabulataka na kila ni tali ibe vei ira na noda marama.
Ena macawa sa oti, e a vakayacori talega na bose ni wasewase ena vuku ni Lotu Wesele e Viti kei Rotuma.
Ka neitou itakitaki ena macawa oqo na i rogo ni bose ni wasewase o Rewa ena vuku ni vakatutu ena kau cake tiko ena vuku ni bose ni Koniferedi ka na vakayacori ena vula o Okosita.
E macawa talega ni sereki oqo vei ira na noda i solisoli ka nuitaki ni ra marautaka na nodra vakacagicagi tiko ena rua na macawa oqo.
E sa nuitaki ni ra na maroroi tiko ka ra marautaka tiko na veivanua era laki vakayagataka kina na nodra vakacagicagi ni bera ni tekivutaki tale na i karua ni wasewase ni vuli ena macawa mai oqo.
E sa tiko talega na i tukutuku ni veivakatoroicaketaki kei na i vaqa vakayalo ena rawa ni vukei keda tiko.
E da vakavinavinakataka talega na i taukei ni bula ena noda sa yacova tale mai oqo na i kalima ni vula ena loma ni yabaki oqo.
Esa i karua ni siga ni vula o Me, eda sa vavaca yani oqo, ka sa toso totolo sara tiko na gauna.
E sa nuitaki tu ni dua na vula vinaka oqo vei keda, ka levu na veika eda na tuvalaka tu ena loma ni vula oqo eda na rawata vakavinaka, ena noda cakacaka vagumatua ena veisiga kece.
E nuitaki ni ko ni na taleitaka na i tabetabe ni Nai Lalakai ena macawa oqo ka mo ni kalougata tiko.

More Stories