Vakanamata ki na qito

E dua na vula osooso eda sa vavaca yani oqo baleta ni levu sara na qito ena mai vakayacori kina.

Matai na kena dolavi na Commonwealth Games ena macawa oqo ka vakayacori tiko mai Ositerelia. Kei na mua ni macawa oqo eratou na gadreva na mata timi ni le yavitu ni Viti me ratou na laveta mai na rara mai Ogo Kogo ena yabaki va veitaravi.

E na dua toka na ulunivanua eratou na cabeta oqo na noda toa ni vala, vakabibi ni da sa kila tu ni ratou rawata mai na i matai ni koula e Viti kei na qito rakavi leyavitu na timi ni Viti ka mai noda kila na lagilagi ena yabaki rua sa oti.

E da na veitokoni tikoga ki na timi ni Viti kei na i tavi eratou na qarava na noda toa ni vala ena loma ni rara rogo mai So Kon Po ena mua ni macawa oqo.

Eda kila talega ni dua na timi vinaka e sa biuta vata tiko oqo o Gareth Baber ena kena gadrevi me rawati ruarua na koula mai na Commonwealth Games e Gold Coast kei na sotasota ni Ogo Kogo ena mua ni macawa oqo.

O Viti e sa tiko talega ena i karua ni tutu ena i tuvatuva ni poidi ni World Rugby HSBC Sevens Series ni yabaki oqo.

E tukuna talega na i vakailesilesi liu ni timi ka ratou sa biubiu oqo ki na Commonwealth Games ni rawa vei Viti me na qoqona mai e levu na metali ena sotasota oqo.

Na qito namaki oqo e ra dau mai vakaraitaki vukivuki kina kei na taledi ni qito o ira na matanitu era qali tu kina matanitu o Peritania ena dua na gauna.

Me vaka eda kila vinaka na nona a qali na matanitu o Viti ena 1874.

E na 1970 e sa qai soli tale mai na veivakadeitaki ni da sa tu vakataki keda ka meda sa liutaka ga vakai keda na noda matanitu.

E levu talega na gonevuli era sa na nanamaki yani kina sotasota ni Coke Games ena mua ni vula oqo.

Ena vula talega oqo ena laki vakayacori mai Siqapoa na Singapore 7s ka i karua ni sotasota ni vula oqo ni bera ni vakacavari yani e Iurope na sotasota oqo na World Rugby HSBC Sevens Series.

E na vuku ni draki suasua eda a donumaka mai ena mua ni macawa, eratou mai yali kina e lima na turaga kei na marama ena vuku ni waluvu kei taubi ni uca e sotavi mai Nadi, Ba kei Rakiraki.

E dodonu ga me da sa dau vakarau tuga ena veigauna kece sara ka taura vakabibi na i vakasala ni Tabana ni Draki ena veigauna.

E ka bibi talega me da yavala ni se siga toka, ka bibi na kena taqomaki na bula, baleta ni dua ga na bula.

E rawa ni vakaisosomitaki na iyau ni vuravura oqo, ia ni sa yali e dua na bula, ena sega ni vakaisosomitaki.

E da vakavinavinaka ki na matanitu ni sa tekivu tale tiko na veivakacokotaki ka sa tuvani tiko na i tuvatuva matau ena kena raici me vakalesui tale na bula ni lewenivanua, ka vukei o ira era leqa dina, ka tomani tale na qaravi ni tavi, bisinisi, kei na vuli vei ira na gone.

More Stories