Vakamau, qito e na dua ga na siga

A YACO kecega ena dua na siga vei Inia Tawalo na naba 15 ni timi ni Fiji Warriors. A vakamau oti ga o Tawalo kei na nona daulomani ko Jokaveti Kamoro mai Batiri e Nadroga. A mani biuta toka yani na nona daulomani qasenivuli me rawa ni lesu tale mai ki Suva ena 3 na kaloko me mai daramaka na siqeleti ni Warriors. A mani tabaka talega kina nai matai ni sikoa nei Viti ena sota kei Samoa A ka ratou qaqa kina ena 33 kei 21 ena ANZ Stadium, e Suva.

A dolava o Samoa na qito ena dua na i caqe ni totogi mai vei D?Angelo Leiuila ni bera ni ratou qai cakacaka vata mai na cauravou ni Viti ena nona tabaka rawa kina e dua na sikoa o Tawalo ka caqeta curu na kena i caqe o Serupepeli Vularika me mai liu kina ena 7 kei 3.

A mani ratou kabakoro tale na cauravou ni Viti ka tabaka kina o Waisale Urabuta na i karua ni sikoa nei Viti ni bera ni qai tabaka nai katolu ni sikoa o Apisalome Vota.

A caqeta curu ruarua na kena i caqe ko Vularika me ratou liu kina ena 21 kei 3. A mani caqeta curu o Samoa e rua nai totogi ka mai 21 kei 9 na kai ena i matai ni veimama.

E ratou kabakoro tale na timi ni Samoa ena i tekivu ni karua ni veimama ka tabaka rawa kina e dua na sikoa o Howard Sililoto ka caqeti curu na kena i caqe me kauta cake na kedratou kai ki na 16 ka 21 tiko o Viti.

A mani tabaka tale e dua na sikoa o Melani Matavao mai na timi ni Samoa me rau mai tai kina ena 21 kei 21.

A mani soli vei Tawalo e dua na pepa dromodromo ena vuku ni veivesu vakadomobula ea vakayacora.

E dina ni ratou lewe tinikava tikoga na dauqito ni Warriors e ratou tabaka rawa tale e rua na sikoa.

E vakaraitaka ko Senirusi Seruvakula na dauniveivakatavulici ni timi ni Fiji Warriors ni ratou a veitalanoataka me na dua na i tekivu vinaka ia e laurai ni levu na vanua e dodonu me ratou na vakavinakataka ni bera na sota kei Japani.

E vakaraitaka o Brian Lima na dauniveivakatavulici ni timi ni Samoa ni doka vakalevu na nodratou i vakarau ni qito na nona cauravou.

More Stories