Vakamalumu yago na Bati

Update: 10:58AM NI oti na nodratou mai qaqa vei Niu Siladi ena mua ni macawa sa oti, esa tovolei tiko me ratou na vakacegu vinaka na cauravou lewe ni timi ni Vodafone Fiji Bati ni bera ni qai ratou tekivutaka tale na nodratou vakaukauwa yago ena nodratou na vakarautaki Ositerelia ena semi fainala ni qito rakavi tinikatolu ni vuravura. E ratou sa tiko ena gauna qo mai Brisbane na noda cauravou Bati ena nodratou vakarautaki Ositerelia tiko ena semi fainala.

Na timi ni Ositerelia e sa vakadruka oti vakarua na timi ni Bati ena rua na semi fainala ni qito ni vuravura ena 2008 kei na 2013.

Ia, eso vei iratou na cauravou ka a qito ena qito ni vuravura sa oti ko Akuila Uate, James Storer kei Ashton Sims ia o Jarryd Hayne a qitotaka na Bati ena 2008 ka a qito ena timi ni Kangaroos ena 2013 ka tabaka kina e va na sikoa ena semi fainala kei na Bati. E tukuna o Kevina Naiqama na kavetani ni Bati ni ratou na cakacaka vata tale ka vakanamata ena qito levu ena mua ni macawa qo. Na tataqomaki ni Bati e kaukauwa sara ena sota kei Niu Siladi ia e tukuna o Mick Potter na dauniveivakatavulici ni Bati ni ratou na vakavinakataka eso na vanua e ratou malumalumu kina ni bera na sota kei Ositerelia. E rau na sota tiko na Kangaroos kei na Bati ena 10 na kaloko ena Vakaraubuka ena i matai ni semi fainala ka na rau sota tiko o Toga kei Igiladi ena 6 na kaloko ena yakavi ni Vakarauwai ena i karua ni semi fainala.

Na fainala levu ena vakayacori tiko ena 10 na kaloko ena Vakarauwai mai qo.

More Stories