Tuvatuva ni lotu

E gadreva na Qase Levu ni Lotu Wesele, Talatala Epineri Vakadewavosa me ra na vakatabui e rauta ni 14 na i talatala qase ni veiwasewase ni bera na Bose ko Viti ena vula o Okosita.

Ena dua na veitalanoa kei na Nai Lalakai, vakaraitaka o Talatala Vakadewavosa ni sa vakatikori oti na i Talatala Qase ni Wasewase o Suva, Vuda, Wasewase o Savusavu, Wasewase o Ra, Wasewase na Wesley e Suva, Davuilevu kei na Wasewase o Vatukarasa.

?Esa vo tale tiko oqo e lewe vitu na veiqaravi vata vakaoqo me rawa niu vakacavara kina ena noqu i tuvatuva ena loma ni yabaki oqo,? e vakadeitaka o Vakadewavosa.

Tukuna ni veika ga e sa vakabibitaki vei ira na i Talatala Qase era sota vata ena vula o Veverueri ni dodonu me ra na dau veitalanoataka vata na bolebole kei na dredre era sotava ka bibi na nodra cakacaka vata ka veitauriligataka vata na i tavi kei na cola i vua ni lotu.

?Ena so na gauna ena dredre mai na i colacola, ka levu na veika ena rogoci, esa ka bibi ga na neimami cakacaka vata ka vakanamata ki na i tavi levu keimami kacivi kina, oya me ra vakalesui na yalo me ra rawata na bula e sa yalataka tu na i taukei ni lotu,? e kaya na Qase Levu.

Vakadeitaka ni sa tiko na i tuvatuva vei ira na i Talatala Qase ena kena vakayacori na bole ena vuku ni soli kei na Cakacaka Levu e sa tu me na saumi mai ena vuku ni veiqaravi ni valenivolavola levu e na Epworth Arcade.

E kuria o Talatala Vakadewavosa ni sa toso sara tiko vakavinaka na veiqaravi ni bisinisi ni Lotu Wesele ka ratou qarava tiko mai o ira na kena dau, oya na Lako Yani Vou Investment ka ratou qarava tiko o Sereana Qoro kei Laisenia Qarase, na i liuliu e liu ni noda matanitu.

More Stories