Tubu totolo

E DUA na i walewale vou ni bisinisitaki yaqona esa tekivuna tiko ko Esala Batiyalo na turaga ni Botenaulu, mai Naitasiri ena gauna qo ka totolo sara na vakatubu i lavo e rawa kina. E vakaraitaka o Batiyalo ni bisinisi ni yaqona e cicivaka tiko qo ea tauyavutaka na marama watina ena $1000.

“Na bisinisi qo e nona na watiqu ka tekivuna ga ena $1000 ka se qai vula ono qo na kena tauyavutaki,” e kaya o Batiyalo.

E tukuna na turaga yabaki 46 qo ni dau volia ga mai na yaqona droka vei ira na dauteitei e Wainimala ka qai mai vakasigana ena vatavata vakarautaki me vakamamaca ena matanisiga ni bera ni qai kauta mai ki Suva me mai volitaki.

“Au dau gole i Suva me’u la’ki volitaka ga na yaqona au lesu tale mai vale,’ e kaya o Batiyalo.

E tukuna o koya ni tubu kece ni lavo e rawati mai na $1000 e volivolitaka e qai dau biuta ena baqe.

“Na tina ga ni lavo o koya e $1000 keirau qai dau vakayagataka tiko kei na watiqu me voli tiko kina na yaqona drokadroka,” e kaya o Batiyalo.

E tomana na nona vakamacala na turaga ni Botenaulu qo ni voli yaqona droka ena $13 dua na kilokaramu ka sa vakila kina o koya na totolo ni tubu ni nona bisinisi ena nona mai volitaka na yaqona sa vakamamacataki ena makete e Suva ena $70 kina $80 dua na kilokaramu.

“Na bisinisi qo esa qai vula ono na neirau cicivaka vakaveiwatini ka’u sa raica kina ni rawarawa ka totolo na tubu au rawata kina,” e kaya o Batiyalo.

Na turaga qo e va taucoko na luvena, ia, e dua vei iratou na nona gone esa tiko mai valagi kei na lewe rua e rau sa cakacaka tiko ena gauna qo ka qarava voli ga mai na nodrau vuli ena vakayagataki qele.

“Au sa raica rawa o au na yaga ni vakayagataki qele ka kamikamica na i lavo e rawa mai kina ka ni da buno kina,” e kaya o Batiyalo.

E kuria o koya ni nona i tuvatuva ga me na tara e dua na nona vale levu ena loma ni nona koro kei na nona volia e dua na lori ni nona matavuvale.

More Stories