Tubu na mate ni suka e Viti

E KAUWAI tiko na Tabacakacaka ni Bula ena levu ni musu ni yava e vakayacori tiko e Viti ka vu mai ena mate ni suka.

E tauri rawa ni 791 na musu ni yava e vu mai ena mate ni suka a vakayacori ena loma ni yabaki sa oti.

Oqo e tuku cake mai na 120 na kisi ka laurai ena yabaki 2015.

Na yabaki oya, 2015 e laurai ni lewe 669 na lewenivanua e mai musu na yavadra ena vuku ni mate ni suka e sa tara na yagodra.

E mai vakaraitaka tiko na i wiliwili oqo na i vukevuke ni Minisita ni Bula o Alex O’ Connor ena dua na kena soqo e vakayacori e Nausori e na siga Moniti.

Tukuna kina na bibi ni nodra taura vakabibi na lewenivanua na i vakasala eso me vaka na  kena qarauni tiko na veimate dewa vakaoqo e sa veitauvi tiko vakalevu ena noda vanua.

E vosa vakabibi tiko, ni wiliwili ni lewenivanua e sa vakadeitaki tiko ni sa tiko vei ira na mate sureti, esa sega ni qai veiwalitaki tale na i wiliwili ni lewenivanua esa tauvi ira tiko, ka ra sa qaravi tiko vakavuniwai.

E vosa vakabibi talega vei ira na tauvimate ni suka, oya me ra sa na qarauna tikoga na nodra bula ka mera vakamuria vakavinaka na i vakasala e ra sa dau vakasalataki kina mai vei ira na vuniwai kei na nasi e valenibula.

E cicivaka tiko ena gauna oqo na Tabacakacaka ni Bula na nodra mai rejisita na lewenivanua ka me rawa ni vakadeitaki na i wiliwili ni lewenivanua e tauvi ira na mate ni suka.

Ena cicivaki tiko na i tuvatuva oqo ni matanitu ena loma ni va na vula mai oqo.

More Stories