Tubu ena $100

Update: 9:46AM ESA tubu ki na $100 na nodra i votavota na turaganikoro ena loma ni dua na vula, ni oti na kena mai kacivaki na i tuvatuva vakailavo ni matanitu ena bogi ni Lotulevu sa oti, vakadeitaka na Vunivola Tudei ni Minisitiri Vakaitaukei, o Naipote Katonitabua.

�Ena veivakadeitaki ni turaga Paraiminisita ka Minisita ni Veika Vakaitaukei, a mai tubu na ivotavota vakailavo ni turaganikoro, a vakarautaki taumada nai votavota ni yabaki vaka i lavo sa oti e $1,074,200.ia ena kerekere ni Tabacakacaka iTaukei sa mai tubu ena $1, 483,179. 

�Qo e kena ibalebale ni sa ra na ciqoma tiko na turaganikoro e $100 na veivula. 

�Sa vakamamasu ni Tabacakacaka iTaukei me toso cake tale vakalailai na nomuni veiqaravi na turaganikoro ka me laurai na duavata kei na bula sautu ena noda veikoro.   Na vinaka ni nomuni veiqaravi ena vinaka ga kina na nomuni koro ka ra tiko vinaka tale ga kina na lewena. 

�Ena vuku ni nasinikoro, au kerea na veivosoti ni mai sega ni dua na ivotavota vakailavo mera saumi kina na nasinikoro,� e kaya o Katonitabua.

Mai na tukutuku e vakarautaki mai ena Minisitiri Vakailavo, vakadeitaki kina ni sa tubu cake mai na $75 ki na $100 na nodra i votavota e ra dau saumi tiko kina mai na matanitu na turaganikoro kece e Viti.

E rauta ni $6.9 na milioni kina Tabacakacaka i Taukei, ka sa oka tiko kina na nodra na veisaumi tiko kina ena loma ni yabaki vakailavo na turaganikoro. Na i lavo talega oqo e na veivuke tiko ena kena cicivaki na matabose ni yasana, na nodra vuli kei na veiqaravi ni valenivolavola ni yasana e 14 ena noda vanua.

E vota na matanitu e rauta ni $13.2 na milioni ki na Minisitiri ni Veika Vakaitaukei ena yabaki vakailavo oqo ni matanitu mai na 2017 ki na 2018.

E laurai ni levu talega na i votavota vakailavo ni matanitu me na qaravi kina na i yalayala ni vanua. Eso na vanua talega era sebera ni soveyataki, ka me tiko na kena i tukutuku matata ki na minisitiri.

Eso talega na yasana e Viti e sebera ni vakacavari kina na cakacaka oqo ena kena soveyataki na qele me vakataki Serua, ka namaki me na vakacavari ena yabaki mai oqo.

O rau na yasana o Macuata kei Lau e namaki me na vakacavari ena yabaki 2020 na kena soveyataki na qele.

Mai na i tukutuku vakarautaki, vakadeitaki talega ni sa na tomana tikoga na Minisitiri ni Veika Vakaitaukei na nodra rejisita na koro vakaitaukei me rauta ni 80 na koro vakaitaukei ka vagolei ena veiqaravi kece oqori, e $2.6 na milioni.

E dua talega na vanua e raica na minisitiri na kena vakabulabulataki ka vaqaqacotaki na vosa kei na i tovo ni kawa i Taukei.

E vica vata na i tuvatuva e sa biuta tiko na tabana qo ena kena laurai me vakavotukana na i tuvatuva oqo kei na kena laurai me na tabaki tale e dua na i Vola Vosa vaka- Viti ( dictionary) ena noda vanua.

E vakarautaki e $1.1 na milioni na matanitu ena kena gadrevi me na tokoni eso na i tuvatuva ni matanitu ka laurai ni maroroi ka vakabulabulataki na noda vosa kei na i tovo na i Taukei ena duidui yasana eda cavutu mai kina.

E na i Vola ni Kawa Bula, era na vakacakacakataki e lewe 14 na lewenivanua ena valenivolavola ni yasana kece , ka ratou na gadrevi na tamata cakacaka oqo me ratou na vakacuruma na i tukutuku kece me baleta na VKB ena vuku ni tukutuku e dau gadrevi ena vuku ni tutu vakavanua, na i yalayala ni qele kei na qoliqoli.

More Stories