Tu vakarau

TIMI kaukauwa o Suva ka ra lewena na dauqito mai na yasana.

Ia, e vakaraitaka na dau ni veivakatavulici ni timi ni Nadroga o Esala Nauga ni ratou sa tu vakarau ki na semifainala ka ratou sega ni beci Suva.

E tomana o Nauga ni sega ni dua e mavoa e na timi ka ra bulabula vinaka na cauravou ni Nadro ka ra sa tu vakarau e na qito bibi me na vakayacori e na Vakarauwai qo.

Taumada au vakavinavinakataka na lewe ni timi ni rawa ni keitou yacova mai na semi fainala ka vaka kina vei ratou na vakalesilesi ni timi, e kaya o Nauga.

Au sa veisureti tiko e na loma ni yasana o Nadroga Navosa ena nomuni na gole mai vakalewe levu mo ni na mai vakadinadinataka na qito e na Vakarauwai qo, e kaya o Nauga.

Sa na vakayacori ga na semi fainala me vaka na siga sa lokuci oti tiko ka sa na vakailavotaka na valenivolavola ni rakavi unioni ena noda vanua (Fiji Rugby Union) na veika e dodonu me na saumi me vaka e laveta cake tiko mai na timi ni Nadroga.

Ni oti na nodra mai bose vata na vei unioni ni rakavi e na noda vanua kei na FRU ena Vakarauwai sa oti, ka vakaraitaka kina o Tiko Matawalu na peresitedi ni timi ni Nadroga ni veika e a kudruvaka tiko sa mai wali ni oti e dua na veivosaki vinaka kei na FRU.

E kaya o Matawalu ni bose oya e vukea na kena vakaukauwataki tale na veiwekani e tiko vei ira na vei unioni ni rakavi e Viti kei na FRU.

E kaya o Matawalu ni sa vakadeitaka na FRU ni sa na saumi tiko na veika e lavaki ni bera na kena vakayacori na bolebole e na bilo ni Farebrother.

E vakaraitaka o Radrodro Tabualevu na vakalesilesi liu ni FRU ni sa dua na veivosaki vinaka e ratou mai cakava ka sa dua na gaunisala vinaka ni nona tekivutaka na nona vakaitavi e na FRU.

Na timi ni Nadroga e na sota tiko kei Suva mai Lawaqa e na i matai ni semi fainala ni Skipper cup ni oti na tolu ena tolusagavulu na miniti (3.30pm) e na Vakarauwai qo.

Ia, na timi ni Naitasiri e na sota tiko kei Nadi e na i karua ni semi fainala e na Ratu Cakobau Park mai Nausori e na Vakarauwai mai qo. Oqo me na macala kina o i rau na qaqa.

More Stories