Toso vakamalua na veivuke ni vale e Saioko

Update: 9:52AM ENA gauna oqo se vakamawe tu ga ena i rairai ni tuvaki ni vanua ena loma ni koro o Saioko na ravuravu ni cagilaba o Winston. A veisiko ena siga ni vakacagicagi ni matanitu ena Vakaraubuka sa oti na Nai Lalakai ena loma ni yavusa vakaturaga o Wailada ena tikina o Nakorotubu ka laurai ni ra se sasaga na lewenivanua me ra cokonaka tale na nodra bula ni oti toka e dua na yabaki vakacaca ni kena ravuti Viti na cagilaba o Winston.

E vakaraitaka ko Kuliniasi Loco e dua na qasenivuli vakacegu ena koro o Saioko ni ra sa dui sasagataka toka na nodra bula me rawa ni ra bau bula toka kina ni bera tiko mai na veivuke ni matanitu.

�Esa qai yacoyaco mai qo na veivuke ni yaya ni tara vale ka veivuke mai kina na matanitu me rawa ni keimami bau mai vakavaletaki kina,� e kaya o Loco.

E kuria na turaga yabaki 75 qo ni a kalougata ni sa bau mai vakavoutaki tale na nona vale ka vukataki ena cagilaba o Winston.

�Na veiniu vei keimami qo e sa sega tu ni vua ka ra sa duri wale tu ga ni sa kauta na cagilaba na vuana,� e kaya o Loco.

E tukuna o koya ni vurevure ni lavo era dau vakararavi kina vakalevu e Saioko kei na baravi kei Nakorotubu na niu ia sa sega tu ena gauna qo.

�Sa qai tekivu yaco mai qo na veivuke ni vale ka sa tekivu sara na tara vale ka keimami qarava vakoro me rawarawa na kena tara,� e kaya o Loco.

Ia, na matanitu esa na tomana tale tiko na veivuke ena veivanua e Viti ka ravuravu kina o Winston, vakabibi na veivuke ni vale.

E rauta ni 40 vakacaca na vale, ka lewe 100 vakacaca na lewenikoro.

E vakaraitaka ena macawa oqo ena bose ni draki veisau na Vunilawa, o Aiyaz Sayed -Khaiyum ni sa vakayagataka oti na matanitu e $125 na milioni ena kena vukei ni rauta e 40,000 na matavuvale e Viti.

E dua vei ira na yasana e Viti e sotava na ravuravu ni cagilaba o Winston, oya na yasana o Ra vakauasivi na tikina o Nakorotubu.

More Stories