Toso tiko na nodra veiqaravi na marama

ERA sa toso sara tiko na i soqosoqo vakamarama mai na koro ko Vanuadina, Tokatoka, e na yasana o Tailevu, e na kena vakatawani tiko na tobu ni nodra i lavo ni soqosoqo.

Eda raica e na Na i Lalakai ni vula o Me, na nodra a tau soli na i soqosoqo vakamarama, ka sa vakavatukanataki sara e na nodra vakavoutaka na nodra valenilotu, kei na kena tara e rua na i kelekele ni basi e na yasa ni koro ruarua,e na vula ko Jiune.

Eda rawa ni raica e kea, na yalovata kei na veiliutaki vakamatau, e na kena domoduataki na qaravi ni i tavi.

Ia, e na macawa sa oti, era sa cavuikalawa sara na marama ni Vanuadina, ena gaunisala ni vaqara i lavo, ka ra cakacaka vata kina.

Sa rairai totoka dina ni da gole yani e na nodra vakatunuloa e na nodra dara mai na nodra i vinivo roka vata, e na veisiga kece era mai volivolitaki kina. E kaya na dauniyau ni soqosoqo, o Ana Gasaudrau, ni oti ga na nodra vakacirisalusalu e na i tavi levu e rua era sa vakavatukanataka oti, era sa bosea vata tale ke rawa ni dua na nodra vakatunuloa e na soqo ni Adi Tebara ka sa mai cava e na Vakarauwai sa oti.

Tomana ni ra sa mani lomavata ka dua na macawa na nodra volivolitaki tiko e na nodra vakatunuloa, ka ra rawata kina e dua na i lavo vinaka.

Kuria o Gasaudrau ni i lavo e ra rawata e na soqo macawa dua o ya, e sa la’ki biu sara ki na nodra tobu ni soqosoqo, ka sa tiko na i tuvatuva me ra na qai vakayagataki kina.

“E ratou tekivuna na marama ni mataqali o Nasava na veiqaravi e na siga Moniti, Tusiti o ira na marama ni mataqali o Tacilevu, kei na siga Vukelulu o ira na marama ni mataqali o Nairai vata kei Naiwau.

“Na siga Lotulevu, Vakaraubuka kei na Vakarauwai, keimami sa qai qarava kece na volivolitaki na lewe ni soqosoqo,” kaya o Gasaudrau

E vakavinavinaka talega vakalevu o Gasaudrau ki vei ira kece sara na lewe ni soqosoqo, ka vakakina o ira na nodra turaga, ka ra veitokoni tiko e na macawa dua ni soqo ni Adi Tebara.

Sa tu na nona vakanuinui na marama yabaki 34 oqo ni ra na yalovata tikoga e na veigauna na lewe ni soqosoqo vakamarama, ka ra tokoni ira tiko na nodra turaga, e na veika e lavaki mai na Lotu, vanua kei na matanitu.

More Stories