Toso nai sau

E NAMAKI me na toso cake na nodra i votavota na turaganikoro e Viti ena gauna ena kacivaki kina na i tuvatuva vakailavo ni matanitu ena siga Lotulevu oqo.

Vakadeitaka mai na Vunivola Tudei ni Veika Vakaitaukei o Naipote Katonitabua, ni sa laki tukuna oti tiko mai Saqani mai Vanua Levu na veika oqo na i liuliu ni noda matanitu.

Ena gauna oqo e tauri rawa tiko ni ra veisaumi tiko na $70 dua na vula me nodra i votavota ena veivula.

Na nodra i votavota na turaganikoro era qai dau taura se ciqoma ni oti e tolu na vula.

‘Sa tiko kece na neitou ituvatuva e na 2017-2018 ni tuvatuva vakailavo me baleti ira na turaganikoro kei na nasi ni koro.

‘Keitou sa vakavinavinaka vakalevu ni ra sa cauraka rawa mai Saqani na i Liuliu ni Matanitu ni sa vakadonui na kena toso cake na nodra i votavota me baleti ira na turaganikoro,’

e vakaraitaka o Katonitabua.

Esa levu talega na veitalanoa e vakayacori tiko me baleta na i tavi ni turaganikoro ena vuku ni lawa ni koro vakaturi, ka eso era kaya ni sa rui levu na matabose lalai e lewena tu o turaganikoro ka me na dau solia tiko na nona ripote se i tukutuku ni matabose vakaitaukei.

E dua talega na nona i tavi na turaganikoro oya me na dau solia na i vakasala matau ena gauna ni bose vakoro me baleta na veivakatoroicaketaki.

E dodonu talega me na dau qaravi ira na i vakailesilesi taucoko vakamatanitu se o ira e tala yani na Roko Tui. E dua talega na nona i tavi na turaganikoro e biu tiko ena lawa ni koro vakaturi oya me na yadravi ira era curuma na koro kei na waqa era na laki vakaruru ena i qoliqoli.

‘Me na raica na turaganikoro na nodra na vakaitavi taucoko na lewenikoro ena cakacaka vakoro me vaka e virikotori ena Lawasau 25 (4) ni Veika Vakaitaukei 1996,’ e vakaraitaki tiko ena lawa ni koro vakaturi.

E vakaraitaka o Katonitabua ni ra na vakacurumi taumada na nodra vakatutu na veiyasana e 14 ni bera ni qai tomani na veitalanoa.

E kaya talega o Katonitabua ni bera ni qai vakadeitaki e dua na ka me baleta na lawa ni koro baleta me ratou na bose taumada na Matabose ni Veika Vakaitaukei.

E na yabaki sa oti, e sa tekivu me ratou vakasokumuna mai na Minisitiri na vakatutu mai na veiyasana.

More Stories