Toso ki liu

Update: 10:51AM

E LAURAI ni toso vinaka sara na nona laki veisiko ki Ositerelia kei Niusiladi na noda i liuliu ni matanitu ena kena vaqaqacotaki na veiwekani ni matanitu e rua kei Viti.

Ena dua na gauna e a mai sega ni veisemati vinaka tu na veiwekani ena vuku ni duidui ni vakasama, ia sa qai kena gauna qo me sa qai vaqaqacotaki tale na veiwekani ni matanitu e rua.

Na kena sa soli talega na veivakadonui vei ira na noda mera sa la�ki cakacaka ki Ositerelia kei Niusiladi, ka ra sa biubiu oti ena tekivu ni vula oqo e lewe 16 na noda e sa dua na i vakaraitaki vinaka ni veisemati veiwekani.

E sa levu talega na noda, era sa laki cakacaka se qito rakavi tu mai valagi, ka ra sa rawata na bula kei na veiqaravi ena vanua levu.

E ra dau yaga mai vakalevu vei keda e Viti o ira na wekada oqo ena vuku ni veivuke vakailavo, se na veivakatoroicaketaki era dau mai cakava ni ra lesu mai.

Ena nona gole oqo ki Ositerelia kei Niusiladi na i liuliu ni matanitu, o Voreqe Bainimarama e sa laki vakota saraga vei ira na vakacicivaki bisinisi mai keya, ni rawa talega ni ra mai tauyavu ka vakacicivaki bisinisi ena noda vanua.

E levu tu na veitabana e Viti era rawa ni ra mai vakayagataka kina na nodra i lavo, ka ra rawata vinaka talega na nodra i naki ni vakacicivaki bisinisi.

E marautaka vakalevu na Minisita ni Qele kei na Bisinisi o Faiyaz Koya na veika e sa rawata na i lakolako oqo ni vakavure bisinisi kei na ilavo ena noda vanua.

E ra veisiko tale tikoga vei ira na noda liga ni wau mai na Tokalau e Loma na noda Peresitedi, o Jioji Konrote ka kaya ni vakavinavinakataka na nodrau laki sota talega kei na Marama Bale na Ranadi.

Me vaka ni se matata tu ga na nodra dau mai veisiko e Viti na Marama na Ranadi, ka kila vinaka na i tukutuku kei na veika me baleta na noda vanua,e a vakaraitaki talega vei ira na veika e sa cakava tiko na matanitu me baleya na veivakacokotaki levu e Viti ni oti na cagilaba o Winston.

Me vaka ni a tabaki talega ena tabana ni tukutuku ni bau dua talega na nodra cau ki na veivuke ni cagilaba na Marama na Ranadi baleta ni kila tu o ira na kedra i sema mai ki Viti ka se tekivu sara mai vua na Ranadi o Vikatoria.

Na veiwekani kei na veisemati oya e ra se kila deivaki toka ga.

E a cauraka talega na nodra vakavinavinakataka na nona mai qaqa vua na timi ni Peritania na noda mata timi qaqa ni le yavitu, ena sotasota ni Rio Olympics ena Okosita ni yabaki oqo.

E dua talega na i tavi bibi era qarava tu na noda sotia ena vuku ni veisaututaki era qarava tu ena buturara ni veivaluvaluti mai na Tokalau e Loma.

Vei keda e Viti, me vaka ni sa tekivutaki talega na Veitarogi ni Fomu 7 kei na 6, ka ra sotava tu e levu na dredre na luveda ena vuku ni nodra vale ni vuli.

 Eso talega vei ira na gonevuli oqori, era tiko talega ena loma ni vale laca me nodra i tikotiko, ka ra laki vuli tale ena vale laca ni ra gole ki koronivuli, ia era sa vulica me ra toso tikoga ki liu.

 Ena dela ni dredre era sotava, ka ra vakarautaki ira ena nodra veitarogi, era sega ni ra guce mera marautaka na nodra bula ena veisiga, vakauasivi na i cegu ni bula e solia tu vei ira na Kalou.

Mai na yanuyanu o Koro, eso na gauna era sa vakasigana tale na nodra i vola ni vuli, ena vuku ni tau ni uca, era laki moce tu e bure, ka ra tu yawa mai vale vei ira na nodra i tubutubu ena vuku ni nodra vosota me ra rawata na nodra vuli kei na nodra bula ena veisiga ni mataka.

Esa tu na vakanuinui ni ko ni na qarava vinaka sara na nomuni vuli kei na veitarogi na gonevuli kece e Viti ena macawa sa tu oqo e matada.

More Stories