Toso ki liu se toso ki muri

Update: 10:00AM

ME vaka eda wilika tiko na nodra osota mai na waqa na lewei Koro ena Vukelulu sa oti, e na nodra sasaga ki Suva mera la�ki taura na nodra tikidua ni veivuke ni tara vale e solia na Minisitiri ni Bula Raraba.

E sa solia tu na matanitu e tolu na wasewase ni veivuke vakailavo vei ira na wekada era vakaleqai oqo.

Ena gauna oqo e duidui tu na nodra gagadre na lewenivanua me baleta na nodra vakacokotaki.

E ka bibi duadua vei keda se dua na tamata, tabu yani me tiko e dua na nona vale.

E vica na veika dredre era mai wasea tiko na wekada mai Koro kei ira mai na yasana o Ra kei na loma ni vanua ena vuku ni veivuke e tukuna oqo na matanitu.

Matai, na kau ni vale kei na i yaya ni vale ena gadrevi, ena sega ni tiko kece ena sitoa era volitaka na i yaya ni tara vale oqo.

Kei na kena la�ki tara na nodra vale na wekada era vakaleqai oqo, era na vaqara ga na nodra matai.

Oqo e sa qai veicalati kei na tukutuku eratou vakabibitaka tiko ka sa kunei mai vei ira na idinia ni tara vale na luluqa e tiko ena vuku ni kena cagina ka vakacacani vakadua na veivale kau kei na vale simede ena noda Viti ni oti na cava o Winston.

E laurai ena ripote oqo ni levu era sega ni vakaivola ena cakacaka vakamatai, era sa tara tu ga na vale ena noda veikoro kei na tikotiko.

Kevaka era na tara ga na nodra vale na lewenivanua, ena yaco tale na leqa oqo- ena sega ni tara na vale ena i vakatagedegede e na gadrevi.

Me vaka eda na kila vinaka ni sa sau levu na gacagaca kece ni tara vale, kei na kau e vakawainimatetaki kevaka ena gadrevi me na qaravi vakavinaka na cakacaka ni veivakacokotaki.

Eso vei ira na wekada era vakaleqai oqo, e lewe levu na lewe ni vale ka rawa ni tiko ena 8 se 9, ka sega ni veirauti kei na i vakarau ni raba kei na balavu ni vale e sa vakarautaka tu na matanitu.

Na leqa talega era na sotava o ira na wekada mai na veiyanuyanu, ena kena vakaleleci na nodra i yaya ni vale mai na i kelekele i waqa e na nodra yanuyanu ki na nodra dui koro, oya e sa dua talega na veitalanoa.

Na ogaoga kei na lomaocaoca ni nodra veiciciyaka na lewenivanua na veika kece oqo me baleta na nodra ka ni vale e dua na ka me na raica vakayalomatua na matanitu.

Ke sa rawa ni kauta ga yani vei ira na i yaya ni veivakacokotaki kei ira na matai ka me ra qai veivuke ga na lewenivanua ena kena tara na vale, oya e sa na mamada sara vei ira na lewenivanua.

Ia, e vakadeitaka na Vunivola Tudei ni Tabana ni Bula Raraba, o Doketa Josefa Koroivueta ni veivuke ni tikidua e solia oqo na matanitu mai na minisitiri oqo ena mai cava tiko ena mua ni vula o Me.

Kevaka era na sega ni vakayagataka na lewenivanua na veivuke oqo ni matanitu, ena taura lesu tale na i lavo e sa solia mai oqo.

Esa vakamatatataka talega na matanitu ni na sega ni veivuke ena kena tara na valenilotu kei na vale ni soqo ni veikoro, ka sa nodra i tavi saraga na lewe ni koro me ra na tara na kena oqori.

Dua tale na leqa e tara koto e vuqa na na vanua era vakaleqai e na gauna oqo sa i koya na votai ni kakana.

E votai tiko vakatautauvata, e lewe levu era kaya ni veicalati tiko na i wiliwili ni dua na matavuvaleka so era lewe tolu, ia, e so e lewe walu se sivia.

Ia, eda vakavinavinaka ki vei ira na veimatanitu kei na veisoqosoqo mai valagi kei ira na veikabani kei ira yadudua e na noda vanua e na veivuke vakailavo era vakatawana kina na tobu ni veivuke ni Paraiminisita kei na i yaya mera mai vukei ko ira na noda era vakaleqai ena Cava o Winston kei na ualuvu ka tara na noda vanua.

More Stories