Tomani tikoga na veivuke

ERA se vakauta tikoga mai na nodra loloma kei na veivuke na wekada vakalotu mai valagi, qo ena kena veiwaseyaki e dua na koniteina mai Lautoka ka vakau mai Ositerelia.

Ka sa sobu talega mai Viti na koniteina yaya ni veivuke mai Amerika- qo na cina ka kena vurevure ni kaukauwa na matanisiga.

Na veivuke oqo mai Amerika, era sa votai kina o ira mai Vanuabalavu kei Lomaiviti.

E vakadeitaka o Talatala Iliesa Naivalu ni vakavinavinakataki na veivuke era solia na wekada mai Ositerelia ena nodra nanumi na gone lalai e Viti.

?E dua na koniteina era vakauta mai qo e sinai mai kina na sucu, na MILO, na wai ni gunu kei na kakana me veitauri vei ira na gone lalai.

?Na i loloma oqo era solia mai na i soqosoqo ni unioni mai na siti levu o Brisbane mai Ositerelia.

?Qo me na veisoliyaki vei ira na wekada mai Ra kei na Vualiku kei Tailevu,? e kaya o Talatala Naivalu.

A la?ki raica na veiqaravi oqo mai Natokawaqa mai Lautoka o Talatala Naivalu ena siga Tusiti.

E vakadeitaka ni se ciqoma tikoga na i yaya ni veivuke na Lotu Wesele ena gauna oqo ka sa vakavinavinakataki na yalo vinaka kei na yalo ni loloma vei ira kece era dodoliga mai oqo. 

E vakadeitaka talega o Talatala Epineri Vakadewavosa ni sa waraki tiko na nodra ripote na i Talatala Qase kece sara ena kena vakasokumuni na levu ni vale ni veiqaravi ni vakatawa se i Talatala kei na valenilotu, ena gadrevi me na vakavinakataki.

?Au se ciqoma ga e rua na ripote ena gauna oqo, ka sa gadrevi tikoga na nodra vakatotolotaka mai na ripote oqo o ira kece na i Talatala Qase,? e kaya o Talatala Vakadewavosa.

E taura rawa na Nai Lalakai ni mai vakacacani vakadua e levu na vale ni Vakatawa kei na valenilotu mai Vanuabalavu, ka levu na soqoni se lotu ena Siga Tabu e sa vakayacori tikoga ena vale vakaitaukei.

?Esa tomani tikoga na bula ena veisiga mai yanuyanu, ka sa vakavinavinakataki ga na matanitu ena nona veivuke ena veivakani kei na veisoqosoqo eso kei na lewenivuvale ena veivuke.

?Era sa vakauqeti tikoga na lewenikoro mera teitei vakalevu ena kena rawa ni tu vinaka na keimami kakana,? e kaya o Talatala.

More Stories