Tokitaki ki Jeruisalemi

ESA ka ni veitalanoa tiko na nona sa vakadonuya na Peresitedi mai Amerika o Donald Trump me sa tokitaki na valenivolavola ni mata ni matanitu o Amerika mai Tel Aviv ki na koro tabu o Jeruisalemi.

Ena tabana ni tukutuku, The Independent vakaraitaki kina ni sa mai dola ena 14 ni Me, na siga Moniti na kena vakayacori na veika oqo.

Esa vakayacori kece sara na vakavakarau me vaka na kena vakavinakataki na rumu ni veivalenivolavola, vakarautaki na senikau kei na kena lili na kuila e rua ena bati ni gaunisala e Jeruisalemni.

Ena dua na i tukutuku e kabi tu ena gaunisala e toqai toka kina na vosa oqo, “ Trump make Israel great.”

Vakadeitaki ena tabana ni tukutuku ni rauta ni $400,000 e vakarautaka na matanitu o Amerika e na veisau ni valenivolavola oqo. Na vanua e sa laki tara kina na valenivolavola ni mata mai Amerika e toka ena ceva kei Jeruisalemi, e Arnona.

Tukuni na kena i tukutuku ni rawa ni na vakavurea na vakasama ni so tale na matanitu mai na veiyasai vuravura me ra na tokitaka na nodra valenivolavola ki Jeruisalemi me vakataki Amerika.

Oqo e sema vata talega kei na yabaki 70 ni nona marautaka o Isireli na i ka70 ni yabaki ni nona tu vakataki koya.

Ia e nanumi tiko ni rawa vua na mata ni matanitu e Amerika ki Isireli me na mai cakacaka tiko e Jeruisalemi, ia na gauna oqo e na vakayacori tiko na veiqaravi ni mata ni matanitu ena rua na vanua – oya e Tel Aviv kei Jerusalemi.

E vakaraitaki talega ni levu era nuiqawaqawataka na vanua era na laki vakaitikotiko kina ena vuku ni toso e sa cakava oqo na matanitu o Amerika ena kena vaqarai na vanua me tara kina na valenivolavola kei na nodra i tikotiko na i vakailesilesi ni mata ni matanitu o Amerika.

More Stories