Tekivu na palimedi

E LAURAI ni katakata sara na veitalanoa e Palimedi ena vuku ni kena ciqomi na Standing Orders ni palimedi ka vakadonui vakalawa ena 2017.

E a kauta cake vakamosoni o Inia Seruiratu na kena taurivaki na kena oqo ka wili tu me vaka ni nodra i vola dusidusi na lewe ni plaimedi.

Ia, e vakaraitaka na liuliu ni to ni veisaqa o Sitiveni Rabuka ni sega ni vinaka ki na i to ni veisaqa na i vola dusidusi oqo.

E vica na veika e tukuna o Rabuka ena vuku ni vola dusidusi oqo oya ni sa sega ni qai rawa ni kau cake ki Palimedi eso na nodra vakatutu na lewenivanua ena vuku ni lawa se na veika era nanuma tu ni tara na nodra bula.

E kaya talega ni sa kau laivi na nodratou i tutu na i to ni veisaqa ena kena liutaki na komiti ka dikeva na i lavo ni matanitu.

Na nodratou rawa talega ni vukevuke ni liuliu ni komiti e Palimedi na lewe ni Palimedi mai na i to ni veisaqa e sa kau laivi ena vola dusidusi oqo.

E vakaraitaka o Salote Radrodro ni sa mai veisau oti vaka va na i voladusidusi ka biu mai ena gauna e sa mai tekivu dabe tale kina na Palimedi ena 2014.

E kaya o Viliame Gavoka ni vola dusidusi e vinaka duadua na kena era a tekivu kina ena 2014 ka sega ni dodonu me veisautaki na kena oya.

E kaya talega o Niko Nawaikula ni vale ni bose lawa oqo e na vaka na Mickey Mouse House kevaka e na vakatarai na Standing Order 51 me na vakatotolotaki kina na veilawa bibi eso e dodonu me veitalanoataki vakavinaka ni sebera ni pasitaki me ra sa lawa.

More Stories