Tauyavu na tei lumi e Rakiraki kei Yasawa

ESA tauyavutaki tiko na tei lumi e Yasawa kei na baravi e Rakiraki ena kena sagai me sa dua na bisinisi ni rawa i lavo na lumi.

E sa vakayacora tiko mai e levu na kena tuvatuva na Minisitiri ni Teitei, kei na Qoliqoli ena kena sagai me vakavurei e vuqa na i tuvatuva me rawa ni tauyavu me dua na bisinisi ka cici vinaka na lumi.

Ena macawa oqo e vakayacori tiko e Nadi e dua na bose mai vei ira na kena dau e Viti, Samoa kei Kiribati ena nodra bosea vata na bolebole kei na veika me ra cakava me rawati kina na sasaga oqo.

E dua na tabana e sa tauyavutaki ka yacana na Diversification of Seaweed Industries in the Pacific ka veivuke mai kina e dua na kena tabana mai Ositerelia kei na University of the Sunshine Coast, e sa mai tauyavutaki kina e 10 na koro ka na vakayacori kin na vakatovotovo ni kena teivaki na lumi kei na kena i vakatagedegede, na gauna e sa na laki tamusuki kina na i tuvatuva oqo.

 E na veitalanoataki talega ena bose ni macawa oqo e Nadi na veika e rawa ena kena rawa ni cicivaki vakabisinisi na nama.

 E kilai vinaka tu e Viti, ni sasalu ni waitui ruarua oqo, e dau voli sara vakalevu ena mua ni macawa, ka rau kakana bulabula.

 Na veika oqo e qaravi tikoga ena kena sagai me vakavurei e levu na makete  ni bisinisi ni yaubula ena noda vanua.

More Stories